ދިވެހި ތަރައިގެ ކޮލެޖު ނުވަތަ ދިވެހި ޤައުމިއްޔަތުގެ އިސްވަރު ދާދި އަވަހަށް އުފެއްދޭނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ދިވެހި ބަހުގެ ދުވަހުގެ މުނާސަބަތުގައި، އެމަނިކުފާނު ފޮނުއްވި ޚިތާބުގައިއެވެ.

މިގޮތުން ރައީސް ޑރ.މުޢިއްޒު ވިދާޅުވީ،  ދިވެހި ޤައުމިއްޔަތުގެ އިސްވަރު އުފެދުމާއިއެކު، މުޅި ރާއްޖެ ބައިވެރިވާ ޤައުމީ ތަރިކަތަކާއި ބަހާތަކާ މެދު ޢިލްމީ ގޮތެއްގައި ފިކުރުކުރާނެ ރަސްމީ ވިޔުގައެއް އުފަންވާނެ ކަމަށެވެ.

Advertisement

ދިވެހި ޤައުމިއްޔަތު އިޢާދަކުރުމުގެ ޤައުމީ ނިޒާމުގެ ބޭނުމަކީ ދިވެހި ބަހަށް އިސްކަން ދިނުމުގެ ޤާނޫނަށް ތަބާވެ، ދިވެހި ބަސް ހެޔޮ ގޮތުގައި ބޭނުންކުރުމަށް ޢަޒުމު ކަނޑައެޅުން ކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ،  ވެރިކަމުގެ ފުރަތަމަ 14 ހަފުތާގެ ތެރޭގައި ޤާއިމު ކުރެވުނު ދިވެހި ތަރިކަ ދިރާސާކުރާ ޤައުމީ މަރުކަޒުގެ ކިޔެވުން ފެށުމުން، ޒުވާނުންނާއި އާންމު އެންމެހާ ފަރާތްތަކަށް ޤައުމިއްޔަތު މާއްދާގެ ފިލާވަޅުތަކުން ހެޔޮ އަސަރުތަކެއް ފޯރާނެ ކަމަށެވެ.

ހަމައެއާއިއެކު،  ދިވެހި ޤައުމީ ޗާޕުޚާނާ އުފައްދާއިރު، ދިވެހިބަހުން ލިޔެވިފައިވާ ޒަމާނީ ފޮތްތަކާއި އެ ނޫންވެސް ޒަމާނީ ޑިޖިޓަލް އުފެއްދުންތައް ދުނިޔޭގެ އެކި ކަންކޮޅުތަކަށް ދިވެހި ބަހުން އާންމުވުމުގެ އިތުރުން ރާއްޖޭގެ ރަށްރަށުގައި ކުތުބުޚާނާތަކާއި ސަގާފީ މަރުކަޒުތައް ޤާއިމުކުރެވޭނެ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ގެ މި ޚިތާބުގައި އެމަނިކުފާނު ވަނީ  އޮފީސްތަކާއި ޚަބަރު ފަތުރާ ވަސީލަތްތަކާއި، ތަޢުލީމާއި، މުޢާމަލާތުގެ ހުރިހައި ދާއިރާއަކުން ވެސް ދިވެހި ބަހަށް އިސްކަން ދިނުމަށް ގޮވާލައްވާފައެވެ.