އިންޓަގްރޭޓެޑް ޓޫރިޒަމްގެ ދަށުން އައްޑޫ ސިޓީގައި ކުރިއަށް ގެންދަން ނިންމާފައިވާ ހަންކެޑެ ޕްރޮޖެކްޓް ގެ ބިންގާ އަޅައިފިއެވެ.

އައްޑޫ ސިޓީގެ ފަތުރުވެރިކަން ކުރިއެރުވުމަށް ފަށާ އެންމެ ބޮޑު މަޝްރޫއު ކަމަށްވާ ހަންކެޑެ މަޝްރޫއު ގެ ބިންގާ އެޅުމުގެ ރަސްމިއްޔާތު މިނިސްޓަރ އޮފް ހޯމްލޭންޑް އަލީ އިހުސާން ޝަރަފްވެރިކޮށްދެއްވި އިރު،  ފަތުރުވެރިކަމުގެ ދާއިރާގެ އެކިފަރާތްތަކާއި ދައުލަތުގެ އިސް ފަރާތްތައް ވެސް މި ރަސްމިއްޔާތުގައި ވަނީ ބައިވެރިވެވަޑައިގެންފައެވެ.

މި ރަސްމިއްޔާތު ޝަރަފްވެރިކޮށްދެއްވައި، ވާހަކަފުޅު ދައްކަވަމުން މިނިސްޓަރ އިހުސާން ވިދާޅުވީ، ރައީސް ޑރ.މުޢިއްޒު އަކީ ހުސްވައުދު ވެވަޑައިގަންނަވާނެ ބޭފުޅެއް ނޫންކަމަށާއި އެމަނިކުފާނުގެ ވައުދުތައް ދައުރުގެ ކުރީ ކޮޅު ފަށައި ކުރިޔަށް ގެންދެވުމަކީ އެކަމުގެ ހެއްކެއް ކަމަށެވެ.

Advertisement

ހަންކެޑެ މަޝްރޫއަކީ އައްޑޫ ބަދަލު ކޮށްލާނެ ޕްރޮޖެކްޓެއް ކަން ފާހަގަކުރައްވާ މިނިސްޓަރ ވިދާޅުވީ، އެކަމުގެ ނަފާ އައްޑޫ ރައްޔިތުންނަށް މި ފަސް އަހަރުގެ ތެރޭގައި ފެނިގެން ދާނެ ކަމަށެވެ.

 ޗައިނާ ނެޝަނަލް އިލެކްޓްރިކް އިންޖިނިއަރިން ކޮމްޕެނީއާ ހަވާލުކޮށްގެން ކުރިއަށްގެންދާ 2،080 އެނދުގެ މި މިޝްރޫއު  އޮތީ މިހާރު އަމަލީ މަސައްކަތް ފެށޭ ހިސާބުގައި ކަމަށް މީގެ ކުރިން ރައީސް ޑރ.މުޢިއްޒު ވަނީ އެމަނިކުފާނު އައްޑޫ އަށް ކުރެއްވި ނުރަސްމީ ދަތުރުފުޅުގައި ވިދާޅުވެފައެވެ. އަދި މި މަޝްރޫއު ނިމިގެންދާއިރު، 1،980 ވަރަކަށް ވަޒީފާގެ ފުރުސަތު އައްޑޫ ސިޓީން ހުޅުވިގެން ދާނެ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ.

މި މަސައްކަތުގެ ވާހަކަ އެމްޑީޕީ ސަރުކާރުން 2021 ވަނަ އަހަރު ދައްކަން ފެށި ނަމަވެސް މިދިޔަ އަހަރު ނިމުނު އިރު ވެސް އެ މަސައްކަތެއް ނުފެށުނު ކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، މި ސަރުކާރުން ތަރައްޤީ ގެނެސްދޭނީ އަމަލީ ގޮތުން ކަމަށާއި، ހަމައެކަނި ވާހަކައެއްގެ ގޮތުގައި ފޮތެއްގައި ލިޔެގެން ނޫން ކަމަށެވެ.

އިންޓަގްރޭޓެޑް ޓޫރިޒަމްގެ ދަށުން ކުރިއަށް ގެންދަން ނިންމާފައިވާ މި މަޝްރޫއު، ކުރީ ސަރުކާރުން ފެށުމަށް މޯލްޑިވްސް ފަންޑް މެނޭޖްމަންޓް ކޯޕަރޭޝަން ކޮމްޕެނީ (އެމްއެފްއެމްސީ) އާއި ޗައިނާ ނޭޝަނަލް އިލެކްޓްރިކަލް އިންޖިނިއަރިން (ސީއެންއީސީސީ) އާއި އެކު މިދިޔަ އަހަރު ސޮއި ކުރި ނަމަވެސް އޭރު އެ މަސައްކަތް ފަށާފައިއެއް ނުވެއެވެ.