މިދިޔަ މަހުގެ 27 ވަނަ ދުވަހު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ގދ.ތިނަދޫ ކައުންސިލް ސިޓީ ކައުންސިލެއްގެ ގޮތުގައި ކަނޑައެޅުއްވުމުން، އެސިޓީގެ ކައުންސިލަރުން އަލުން މަގާމުގެ ހުވާކޮށްފިއެވެ.

ރޭގައި މިކަމަށްޓަކައި އެރަށުގައި ބޭއްވި ހާއްސަ ރަސްމިއްޔާތެއްގައި ރަށު ކައުންސިލްގެ ރައީސާއި ނައިބު އަދި މެންބަރުން ސިޓީ ކައުންސިލްގެ މޭޔަރާއި ޑެޕިއުޓީ މޭޔަރު އަދި މެންބަރުންގެ ހުވާ ކުރައްވާފައިވާއިރު، ކައުންސިލުގެ މެންބަރުންނަށް ހުވައި ލައިދެއްވީ ތިނަދޫ މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛާ ނަޝާތަތު ޒަޢީމެވެ.

ތިނަދޫ ކައުންސިލް ސިޓީ ކައުންސިލަކަށް ބަދަލުވެގެން ދިޔުމާއި އެކު ތިނަދޫ ސިޓީ ކައުންސިލްގެ އިދާރާގެ ނަން އިނގިރޭސި ބަހުން ބޭނުންކުރަން ހަމަޖައްސަވައިފައިވަނީ"Secretariat of the Thinadhoo City Council" އެވެ. ހަމައެއާއިއެކު، ދައުލަތުގެ އިދާރާތަކުން ތިނަދޫ ސިޓީ ކައުންސިލަށް ލިޔާ ސިޓީ ނަންބަރަކީ ކުރިންވެސް ތިނަދޫ ކައުންސިލަށް ހަމަޖައްސާފައިވާ ނަންބަރުކަމަށްވާ 415 އެވެ.

މި ބަދަލާއި އެކު، ތިނަދޫ ކައުންސިލްގެ ރައީސްގެ މަގާމުގައި ހުންނެވި ސައުދު އަލީގެ މަގާމު ވަނީ އެ ސިޓީގެ މޭޔަރަށް ބަދަލުވެފައެވެ. އަދި ނައިބު ރައީސަކަށް ހުންނެވި ނަސްރުﷲ އަލީގެ މަގާމު ވަނީ ޑެޕިއުޓީ މޭޔަރަށް ބަދަލުވެފައެވެ.

ތިނަދޫ ސިޓީ ކައުންސިލް މެމްބަރުން:

1. ސައުދު އަލީ- މޭޔަރު

2. ނަސްރުﷲ އަލީ- ޑެޕިއުޓީ މޭޔަރު

3. އަހުމަދު ވަހީދު- ސިޓީ ކައުންސިލް މެންބަރު

4. މުޙައްމަދު ޒަލީފް އަބްދުﷲ- ސިޓީ ކައުންސިލް މެންބަރު

5. އަހުމީމާ އަހުމަދު- ސިޓީ ކައުންސިލް މެންބަރު

6. އާމިނަތު ނަސީމާ- ސިޓީ ކައުންސިލް މެންބަރު

7. އައިޝަތު ލިއުޝާ ޒުބައިރު- ސިޓީ ކައުންސިލް މެންބަރު

ރޭގައި ބޭއްވުނު ރަސްމިއްޔާތުގައި ތިނަދޫ ސިޓީގެ ކައުންސިލުން މަގާމުގެ ހުވާ ކުރައްވައި، އިގްރާރުގައި ސޮއި ކުރެއްވި އިރު،  ތިނަދޫ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުން ވެސް އައު މަގާމުތަކުގެ އިގުރާރުގައި ސޮއި ކުރައްވާފައިވާކަން ފާހަގަކޮށްލަން ޖެހެއެވެ.