އަހަރެއްހާ ދުވަހުގެ ވާރޭ ވެހި ދުބާއީގެ މަގުތައް ފެންބޮޑު ވެއްޖެއެވެ. 

ދުނިޔޭގެ ދެވަނައަށް އެންމެ ބިޒީ އެއާޕޯޓުގެ ލަގަބު ދާދިފަހުން ދެވިފައިވާ ދުބާއީ އެއާޕޯޓުގައި ވެސް ވަރަށް ބޮޑަށް ފެންބޮޑުވެފައިވާއިރު، ރިޕޯޓްތައް ބުނާ ގޮތުން އެ އެއާޕޯޓުގައި ޕާކު ކޮށްފައިވާ ޖެޓް ތަކާއި ފްލައިޓްތައް ވެސް ކަނޑުމަތީގައި ދަތުރުކުރާ އުޅަނދުތަކަކާއި ވައްތަރުވާވަރަށް ފެންގަނޑު ވަނީ ބޮޑުވެފައެވެ.

އެހެންކަމުން ދުބާއި އިންޓަރނޭޝަނަލް އެއާޕޯޓަށް ޖައްސަން ހަމަޖެހިފައިވާ ފްލައިޓްތައް ވެސް އެހެން އެއާރޕޯޓަކަށް ޖައްސާާގޮތަށް ބަދަލުކޮށްފައިވާއިރު، މި ވިއްސާރައިގެ ސަބަބުން އެގައުމުގެ ސްކޫލްތަކާއި އޮފީސްތައް ވެސް ވަނީ ބަންދުކޮށްފައެވެ.

ވިއްސާރައިގެ ސަބަބުން ފެންބޮޑުވެ މަގުތަކުގައި ހިނގާބިގާވެ އުޅުން ވެސް ދަތިކަމަކަށް ވެފައިވާއިރު، މިއީ ފާއިތުވި ދެ އަހަރުވެސް އެގައުމަށް ވާރޭ ނުވެހޭ މިންވަރެއް ކަމަށް ކަމާ ބެހޭ ފަރާތްތަކުން ވަނީ ބުނެފައެވެ.

ދުބާއީން އަދި މި ވިއްސާރައިގެ ސަބަބުން ލިބުނު ގެއްލުންތައް ހާމަކޮށްފައިނުވި ނަމަވެސް، އެގައުމުގެ ފުލުހުން ބުނީ އެގައުމުގެ އެންމެ އުތުރުގައި އޮންނަ ރަސް އަލް ޚައިމާގައި ފެންބޮޑުވުމުގެ ސަބަބުން އުޅަނޑު އޮޔާދިޔުމުގެ ތެރޭގައި 70 އަހަރުގެ ފިރިހެނަކު މަރުވެފައިވާ ކަމަށެވެ.

ދުބާއީ އަށް ކުރަމުންމިދާ ވިއްސާރައިގެ އަސަރު އޮމާން އަށް ވެސް ކޮށް، އެގައުމުގެ 18 މީހަކު މަރުވެފައިވާއިރު، އޭގެ ތެރޭގައި 10 ސްކޫލް ކުދިންވެސް ހިމެނެއެވެ.