ކުރީގެ ރައީސް އަބްދުﷲ ޔާމީން އަބްދުލް ޤައްޔޫމުގެ މައްޗަށް އިއްވި 11 އަހަރުގެ ޖަލު ޙުކުމްތަކުގެ ތެރެއިން ރިޝްވަތުގެ ކުށުގައި އިއްވި ހަތަރު އަހަރުގެ ޖަލު ޙުކުމްގެ ހައި ކޯޓުން ދެންމެ ބާޠިލްކޮށް، އަލުން އެ މައްސަލަ ބަލަން ޢަމުރުކޮށްފިއެވެ.

ވ. އާރަށުގެ މުޢާމަލާތާ ގުޅިގެން ރިޝްވަތު ޤަބޫލުކުރުމާއި، މަނީ ލޯންޑްރިންގެ ކުށުގައި ޖުމްލަ 11 އަހަރުގެ އަހަރުގެ ޖަލު ޙުކުމެއް އިއްވިއިރު ކުރީގެ ރައީސް ޔާމީނަށް އިއްވާފައި ވަނީ 2022 ވަނަ އަހަރުގެ ޑިސެމްބަރު މަހުގެ 25 ގައެވެ.

ހައި ކޯޓުން މިއަދު ކުރި ޙުކުމުގައިވަނީ ޝަރީއަތުގެ ކުރީގެ މަރުހަލާގައި ޔާމީންގެ ދިފާޢީ ހެކިތައް ނަފީކުރަން ދައުލަތުން ހުށަހެޅި އާ ހެކިތައް ބަލައިގަތުމަށް ކްރިމިނަލް ކޯޓުން ނިންމި ނިންމުން ގޯސް ކަމަށާ އެކަންކުރީ އެކަށީގެންވާ ސަބަބެއް ބަޔާން ކުރުމެއް ނެތި ކަމަށެވެ. އަދި އެ އެކަމާ މެދު ވާހަކަ ދައްކަން ޔާމީންގެ ވަކީލުންނަށް ފުރުސަތު ދީފައިނުވާ ކަމަށްވެސް މިއަދު ކުރި ޙުކުމުގައިވެއެވެ.

Advertisement

ނަމަވެސް އެ މައްސަލާގައި ހެކިތަކަށް ބަދަލު އައުމުގެ ފުރުސަތު ޙުކުމުގައި ވަނީ އޮތުމުން އެ މައްސަލަ އަލުން ބެލުމަށްޓަކައި ކްރިމިނަލް ކޯޓަށް ތަހުވީލުކުރީ ކަމަށެވެ.

މިކަން ފާހަގަކޮށް، މިއަދު އިއްވި ޙުކުމުގައިވަނީ ދަށު ކޯޓުގެ ހުކުމް ބާތިލްކުރާ ކަމަށެވެ.

އެ މައްސަލަ ހައި ކޯޓުން ބެއްލެވީ ފަނޑިޔާރު ހުޒައިފާ މުހައްމަދާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރު މުހައްމަދު ސަލީމެވެ. ބެންޗުގެ ރިޔާސަތަކީ ފަނޑިޔާރު ހުޒައިފާ އެވެ.

މަނީ ލޯންޑްރިންގެ ކުށުގައި އިއްވި ޖަލު ޙުކުމާ ގުޅޭގޮތުން ހައި ކޯޓުން ނިންމުމެއް ނިންމާނީ މިރެއެވެ.