ގެދޮރުވެރިޔާ ސްކީމުގެ ދަށުން ފްލެޓް ދޫކުރުމާ ގުޅޭގޮތުން މިހާރު ދަޢުރުވަމުންދާ ލިސްޓަކީ، އެންޓި ކޮރަޕްޝަން ކޮމިޝަނު (އޭސީސީ) ގެ ލިސްޓެއް ނޫންކަމަށް އެ ކޮމިޝަނުން ވިދާޅުވެއްޖެއެވެ.

މިއަދު ނެރުނު ނޫސްބަޔާނެއްގައި އެންޓި ކޮރަޕްޝަން ކޮމިޝަނުން ވިދާޅުވީ ގެދޮރުވެރިޔާ ސްކީމުގެ ދަށުން ފްލެޓަށް ޝަރުތު ހަމަވާކަމަށް އޭސީސީއިން ކަނޑައަޅާފައިވާ ކަމަށް ބުނާ ލިސްޓެއް މިހާރު މީސްމީޑިޔާގައި ދަޢުރުވަމުން ދާކަމަށާއި، އެ ލިސްޓަކީ އެ ކޮމިޝަނުގެ ލިސްޓު ނޫންކަން އެ ކޮމިޝަނުން ބެލި ބެލުމުން އެނގިފައިވާ ކަމަށެވެ.

މި މައްސަލައާއި ގުޅިގެން އިތުރަށް ތަޙުޤީގު ކުރަން ޖެހޭ ކަންކަން އޭސީސީ އިން ތަޙުޤީގު ކޮށް، އަޅަންޖެހޭ ފިޔަވަޅުތައް އަޅާނެކަމަށް ވެސް އޭސީސީއިން ވިދާޅުވިއެވެ.

Advertisement

އޭސީސީއިން އިތުރަށް ބުނެފައި ވަނީ ކޮމިޝަނުގެ އެއްވެސް މަސައްކަތަކަށް އެއްވެސްމީހެއްގެ ނުވަތަ ފަރާތެއްގެ އެއްވެސް ނުފޫޒެއް ނޯންނާނެކަމުގެ ޔަގީންކަން ރައްޔިތުންނަށް އަރުވާ ކަމަށެވެ. އަދި ކޮމިޝަނުގެ އެންމެ މަތީ މަސްލަހަތަކީ ޤާނޫނު ނަގަހައްޓާ ރައްޔިތުންގެ މަސްލަހަތު ޙިމާޔަތް ކުރުން ކަމަށްވެސް އޭސީސީގެ ބަޔާނުގައި ވެއެވެ.

މީގެ އިތުރުން ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭ ގޮތުން އެކި މީސްމީހުން ދޮގު ޚަބަރުތައް ފަތުރަމުންދާތީ އެކަން އެގޮތަށް ނުކުރުމަށްވެސް އޭސީސީއިން ވަނީ އިލްތިމާޒު ކުރައްވާފައެވެ.