ސިފައިންގެ 132 ވަނަ އަހަރީ ދުވަހުގެ މުނާސަބަތުގައި ދިވެހި ދިދައަށް އިޙްތިރާމު ކުރުމުގެ ގޮތުން ހާއްސަ ރަސްމިއްޔާތެއް ބާއްވައިފިއެވެ.

މިއަދު ހެނދުނު 6 ޖެހިއިރު ކަޅުތުއްކަލާކޮށީގައި ބޭއްވި މި ޚާއްޞަ ރަސްމިއްޔާތު ދިފާޢީ ވަޒީރު އޮނަރަބަލް ޣައްސާން މައުމޫން ޝަރަފުވެރި ކޮށްދެއްވާފައިވާއިރު، ސިފައިންގެ 132 ވަނަ އަހަރު ބޭނުންކުރުމަށް ހަމަޖެހިފައިވާ ޝިއާރުކަމުގައިވާ "ޤައުމުގެ މިނިވަންކަން – ސިފައިންގެ ސާބިތުކަން" މި ޝިއާރު ވަނީ މި ރަސްމިއްޔާތުގައި ހާމަކޮށްފައެވެ.

އެމްއެންޑީއެފުން ބުނީ، ޝިއާރު ހާމަކޮށްދެއްވުމުގެ އިތުރުން، ދިވެހި އަސްކަރިއްޔާއިން އަހަރަކު ދެފަހަރު ނެރެމުން އަންނަ "އައްޑަނަ މަޖައްލާ" ގެ 34 ވަނަ ޢަދަދު ވެސް މި ރަސްމިއްޔާތުގައި ވަޒީރު ވަނީ ނެރެދެއްވާފައިކަމަށެވެ.

Advertisement

މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއާއި، ސިފައިންގެ ޖެނެރަލް އޮފިސަރުންނާއި، އޮފިސަރުންނާއި، ވޮރަންޓް އޮފިސަރުންގެ އިތުރުން އެންލިސްޓެޑް ރޭންކުތަކުގެ ގިނަ ޢަދަދެއްގެ ސިފައިން ބައިވެރިވެފައިވާކަމަށް އެމްއެންޑީއެފުން މައުލޫމާތު ދެއެވެ.

ޚާއްޞަ ދުޢާ އަކާއި ސިފައިންގެ ލަވައިން މި ރަސްމިއްޔާތު ނިމިގެން ދިޔައިރު، އެމްއެންޑީއެފުން ބުނީ ސިފައިންގެ ދުވަހުގެ މުނާސަބަތުގައި ދިވެހި ދިދައަށް އިޙްތިރާމު ކުރުމުގެ ގޮތުން ސިފައިންގެ އޭރިއާ ކޮމާންޑްތަކުގައި ޤާއިމްކޮށްފައިވާ ހުރިހާ މަރުކަޒެއްގައި ވެސް މިއަދު ހެނދުނު މި ރަސްމިއްޔާތު ކުރިއަށްގެންގޮސްފައިވާ ކަމަށެވެ.

ދިވެހިރާއްޖޭގައި ސިފައިންގެ ޚިދުމަތް ފެށިފައިވަނީ 1892 އެޕްރީލް 21 ވަނަ ދުވަހުއެވެ.