ކުރިއަށް އޮތީ ރާއްޖެ ތަރައްގީވާ ދުވަސްތައް ކަމަށާއި، އެކަމަށް ސަރުކާރުގެ ވެރިން އުޅުއްވަން ޖެހޭނީ 24 ގަޑިއިރު ހޭލާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައްޔިތުންގެ މަޖިލީސް އިންތިހާބުގައި ސަރުކާރަށް ލިބުނު ބޮޑު ކާމިޔާބީއާ ގުޅިގެން އެކަން ފާހަގަކުރުމަށް ރޭގައި އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ޤައުމު ނުބައި މިސްރާބަކުން ދަނިކޮށް ރަނގަޅު، ހެޔޮ މިސްރާބަށް ރައްޔިތުންގެ ބުރަ މަސައްމަތުން ރިޔާސީ އިންތިޚާބުގައި ގެނެސް، އެ މަސައްކަތް ބޭކާރުވިޔަ ނުދިނުމަށްޓަކައި ބޭނުންވާ މިންވަރު ޔަޤީންވެގެން ގޮއްސި ކަމަށެވެ.
މި ވޭތުވެދިޔަ 5 މަސް ދުވަހުގެ ތެރޭގައި ވަރަށް ދަތި އުނދަގުލުގެ ތެރޭގައި ނަމަވެސް ސަރުކާރަށް ކޮންމެވެސް ވަރަކަށް ނަތީޖާ ނެރެވުނުކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، ކުރިއަށް އޮތީ އެ ފަސް މަސްދުވަހަށް ވުރެ މަސައްކަތުގެ ދުވެލި އަވަސްކުރުން ކަމަށާއި، ދެން ފެށޭނީ މިޤައުމު ތަރައްޤީވާން ކަމަށެވެ.
"އަޅުގަނޑުގެ ކެބިނެޓް މެމްބަރުންނާއި، ކުންފުނިތަކުގެ ވެރިންނާއި އަދި އަޅުގަނޑުމެންގެ އިއްޒަތްތެރި މަޖިލިސް މެންބަރުންނަށް ދަންނަވާލަން ބޭނުންވަނީ، މި ވޭތުވެދިޔަ 5 މަސް އެއީ އަދި އެއްވެސް އެއްޗެއް ނޫނޭ. ދެން ތިބޭފުޅުން އުޅުއްވަންޖެހޭނީ 24 ގަޑިއިރު ހޭލައޭ. ހަމަސީރިއަސްކޮށް މި ދަންނަވަނީ އަޅުގަނޑު ބޭނުންވަނީ ރައްޔިތުންނަށް ތަރައްޤީ އަޅުގަނޑު ބޭނުންވިގޮތަށް ގެނެސްދޭން."
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، މި ސަރުކާރަކީ ބަހަނާ ދައްކާ ބައެއް ނޫން ކަމަށާއި، އެމަނިކުފާނުގެ ޓީމަކީ އިޚްލާސްތެރިކަމާއެކު ސީރިއަސް މަސައްކަތެއް ކުރަންތިބި ބައެއްކަމަށެވެ.
ރައީސް ޑރ.މުޢިއްޒު ވަނީ ގެދޮރުވެރިކަން ޔަޤީންކޮށް، އިޤްތިޞާދު ވަރުގަދަކޮށް، ގައުމުގެ ޢުމްރާނީ ތަރައްޤީ ދިވެހިން އެދޭގޮތަށް ހުރިހާ ރަށެއްގައި ހާސިލްކުރާނެ ކަމަށާއި، ދެމެހެއްޓެނިވި ތަރައްޤީގެ ސިޔާސަތު ކަނޑައަޅާފައިވާގޮތަށް ތަންފީޒްކޮށް، މިޤައުމު ތަރައްޤީކުރުމުގެ މަސައްކަތް ކުރިއަށް ގެންދާނެކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
