ގައުމު ތަރައްގީކޮށް ކުރިއެރުވުމަށް ހުރިހާ ސިޔާސީ ވެރިން އެކީގައި ކުރިއަށް ދިޔުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގޮވާލައްވައިފިއެވެ.
ރައްޔިތުންގެ މަޖިލީސް އިންތިހާބުގައި ސަރުކާރަށް ލިބުނު ބޮޑު ކާމިޔާބީއާ ގުޅިގެން އެކަން ފާހަގަކުރުމަށް ރޭގައި އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މަޖިލިސް އިންތިހާބު ނިމިފައިވާއިރު، ހުރިހާ ސިޔާސީ ވެރިންނާއި ހުރިހާ ސިޔާސީ ޕާޓީތައް ވެސް އެކީގައި ކުރިއަށް ދިޔުމަށް ގޮވާލައްވާކަމަށެވެ.
އެގޮތުން ރައީސް ޑރ.މުޢިއްޒު ވިދާޅުވީ، އެމަނިކުފާނު ކުރިމަތީގައި ދިވެހި ކޮންމެ ރައްޔިތަކު ހަމަހަމަވާނެ ކަމަށާއި ކޮންމެ ޕާޓީއަކަށް ނިސްބަތްވިޔަސް އެ ރައްޔިތަކީ މުހިންމު ރައްޔިތެއް ކަމަށާއި، އެއިން ކޮންމެ ބޭފުޅަކު ދެކެ އެމަނިކުފާނުގެ ހިތުގައި އޮތީ ލޮތްބާއި ގަދަރު ކަމަށެވެ.
"އިންތިހާބު ނިމުނީ، އަޅުގަނޑު ވަރަށް އަދަބުވެރިކަމާއި އެކީގައި ވަރަށް އުފަލާއި އެކީގައި ގޮވާލަން، ހުރިހާ ސިޔާސީ ވެރިންނަށްވެސް ހުރިހާ ސިޔާސީ ޕާޓީތަކަށްވެސް ހިންގަވާށޭ ކުރިއަށް ދާން، މި ގައުމަކީ އަޅުގަނޑުމެންގެ އެންމެންގެ ގައުމު، މި ގައުމަކީ ކޮންމެ ދިވެހި ލޮބުވެތި ރައްޔިތެއްގެވެސް ގައުމު، އެހެންވީމަ ހުރިހާ ބޭފުޅުން އަތުކުރި އޮޅާލައިގެން އެންމެން އެކީގައި ހިނގާށެ ކުރިއަށްދާނެ، އިރާދަކުރެއްވިއްޔާ އެންމެންނަށް ލިބޭނީ އުފާވެރިކަން."
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވަނީ ޤައުމު ތަރައްގީކޮށް ކުރިއެރުވުމަކީ ކޮންމެ މީހެއްގެ ވެސް ފަޚުރު ކަމުގައި ދެކިގެން އެކުގައި މަސައްކަތް ކުރަންޖެހޭކަން ފާހަގަކުރައްވާ އިސްލާމްދީނަށް ނަސްރު ދިނުމުގެ ހިތްވަރު އައުކޮށް، ކުރިން ރާއްޖޭގައި އޮތް އަވަށްޓެރިކަމާއި އެކުވެރިކަމުގެ ރޫހު އަލުން އިއާދަކޮށް ހަގީގީ މާނާގައި ޤައުމަށް ހަމަޖެހުން ގެނައުމުގެ އަޒުމް އައު ކުރުމަށް ވެސް ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
