މިދިޔަ އާދިއްތަ ދުވަހު އޮތް މަޖިލިސް އިންތިހާބުގައި އަމިއްލަ ގޮތުން ވާދަކުރައްވައި، ގޮނޑި ކާމިޔާބު ކުރެއްވި ގިނަ ބޭފުޅުންތަކެއް ސަރުކާރު ހިންގާ މައި ޕާޓީ، ޕީއެންސީ އާއި ގުޅިވަޑައިގެންފިއެވެ.

ޕީއެންސީ އާއި ގުޅިވަޑައިގެން އިންތިހާބީ މެމްބަރުންނަކީ އިންތިހާބުގައި ސަރުކާރުން ތާއީދުކުރައްވާފައިވާ މެމްބަރުންނެވެ.

ޕީއެންސީން ބުނީ އަމިއްލަގޮތުން އިންތިޚާބުވި ހަ މެންބަރަކު އެ ޕާޓީއަށް ސޮއިކުރައްވާފައިވާ ކަމަށެވެ. އެ މެމްބަރުންނަކީ:

Advertisement

1) ޑރ. އަނާރާ ނަޢީމް – ހުރާ ދާއިރާ

2) ޙަސަން ޒަރީރު – މަތިވެރި ދާއިރާ

3) އަހްމަދު ޒަމީރު – މައްޗަންގޮޅި މެދު ދާއިރާ

4) އަޙްމަދު ރިޔާޒް – ތިމަރަފުށި ދާއިރާ

5) ޔާސީން ޢަބްދުﷲ - ނައިފަރު ދާއިރާ

6) ޢާޒިމް ޢަބްދުލް ޢަޒީޒް – ވިލިނގިލި ދާއިރާ

އިންތިހާބުގެ ވަގުތީ ނަތީޖާ ދައްކާގޮތުން، ޕީއެންސީގެ ޓިކެޓްގައި 66 މެންބަރުން އިންތިޚާބުވިއިރު މި ހަ މެމްބަރުންނާއި އެކު ޕީއެންސީ އަށް ތާއީދު ކުރާނެ 72 މެމްބަރުން ތިބޭނެ އެވެ. ހަމައެއާއިއެކު ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ. 

ޕީއެންސީން އެމްޑީއޭގެ ރައީސް އަހުމަދު ސިޔާމް، އެމްއެންޕީގެ ރައީސް މުހައްމަދު ނާޒިމްގެ އިތުރުން މާމިގިލީ ދާއިރާގެ މެންބަރު ގާސިމް އިބްރާހީމަށް ވެސް ތާއީދު ދީފައިވާއިރު، މި ތިން ބޭފުޅުން ވެސް ވަނީ އިންތިހާބު ކާމިޔާބު ކުރައްވައި، ގޮނޑި ކަށަވަރު ކުރައްވާފައެވެ.

ޕީއެންސީން 20 ވަނަ ރައްޔިތުންގެ މަޖިލީހުގެ ސުޕަމެޖޯރިޓީ ހޯދާފައިވާއިރު، އަލަށް އިންތިހާބުވެވަޑައިގެން މެމްބަރުންގެ ހުވާ ކުރެއްވުން އޮންނާނީ އަންނަ މަހުގެ 28 ވަނަ ދުވަހުއެވެ.