ޣައްޒާގައި ހިންގަމުންދާ ގަތުލުއާއްމާއި ދެކޮޅަށް އެމެރިކާގެ އެކި ކަންކޮޅުތަކުގައިވާ ޔުނިވާސިޓީތަކުގެ ދަރިވަރުން މުޒާހަރާ ކުރަން ފަށައިފިއެވެ.

ޣައްޒާގެ ގަތުލު އާއްމާއި ދެކޮޅަށް ދަރިވަރުންތަކެއް ހަރާކަތެއް ފެށި ފުރަތަމަ ޔުނިވާސިޓީ ކޮލަމްބިއާގެ ޔުނިވާސިޓީ ކަމަށް ވާއިރު އެ ދަރިވަރުން ޔަހޫދީންނާ ދެކޮޅު ކަމަށް ވަނީ ތުހުމަތު ކޮށްފައެވެ. އައިވީ ލީގުގައި ހިމެނޭ މި ޔުނިވާސިޓީގެ މުޒާހާރާގެ ބައިވެރިން ހައްޔަރުކޮށް މުޒާހަރާ ރޫޅާލުމަށް އެ ޔުނިވާސިޓީގެ ރައީސް އެންގުމާއި ގުޅިގެން 100 އަށް ވުރެ ގިނަ ދަރިވަރުން ވަނީ ހައްޔަރުކޮށްފައެވެ. 

މިކަމާއި ގުޅިގެން މި މުޒާހަރާ މިހާރު އެގައުމުގެ 9 ޔުނިވާސިޓީއެއްގައި ކުރިއަށް އެބަ ދެއެވެ. އޭގެ ތެރޭގައި ނަން މަޝްހޫރު ހާވާޑް ޔުނިވާސިޓީ އާއި ޔޭލް ޔުނިވާސިޓީ އާއި ނިއު ޔޯކް ޔުނިވާސިޓި ހިމެނެއެވެ.

މި މުޒާހަރާގެ  ބައިވެރިން ދަނީ ޔުނިވާސީޓީ ތަކުން އިސްރާއީލާއި ގުޅުން ހުރި ކުންފުނިތަކާއި މީހުންނާއި އޮތް ގުޅުން ކަނޑާލުމަށާއި، އެމެރިކާއިން އިސްރާއީލަށް ދޭ އެހީތައް ހުއްޓާލުމަށް ގޮވާލަމުންނެވެ.

އެންމެ 70 ދަރިވަރުން އެކުލެވޭ ޓީމަކުން ފެށީ މި މުޒާހަރާ ރޫޅާލުމަށް ކޮލަމްބިއާ ޔުނިވާސިޓީން ނިންމުމާއި ގުޅިގެން މިކަން މިހާރު ވަނީ ޤައުމީ އަދި ބައިނަލްއަޤްވާމީ ގޮތުން ފެތުރިފައިކަމަށް މުޒާހަރާގެ ބައިވެރިއެއްގެ ބައްޕަ ކަމަށްވާ ޑިމޮކްރެޓިކް ރިޕަބްލިކަން އިލްހާން އުމަރު ވަނީ ވިދާޅުވެފައެވެ.

ކޮލަމްބިއާގެ އިތުރުން އެމޯރީ ޔުނިވާސިޓީ ގައި ވެސް މި މުޒާހަރާ ކުރަމުން އަންނައިރު، އޭގެ ތެރޭގައި އެ ޔުނިވާސީޓީ އަށް ނިސްބަތް ނުވާ ދިހަ ވަރަކަށް މީހުން ވަނީ އެ ޔުނިވާސިޓިގެ ބޭރުގައި ޓެންޓް ވެސް ޖަހާފައެވެ. 

މުޒާހަރާގެ ބައިވެރިން ޔުނިވާސިޓީގެ ބޭރުގައި ޓެންޓް ޖަހާފައި-- ފޮޓޯ: އޭޕީ

ހަމައެއާއިއެކު، ވޮޝިންޓަން، ޑީސީ-ސަރަހައްދުގެ ޔުނިވާސިޓީ ތަކުގެ ދަރިވަރުންނާއި ފެކަލްޓީ މެމްބަރުން ވަނީ ޖޯޖްޓައުން ޔުނިވާސިޓީ އާއި ކައިރީގައި އޮންނަ ޖޯޖް ވޮޝިންޓަން ޔުނިވާސިޓީ އާއި ދެމެދު ސުލްހަވެރި ހިނގާލުމެއް ބާއްވައި، ޓެންޓް ޖެހިނަމަވެސް މި ހަރަކާތުގެ ތެރެއިން މީހަކު ހައްޔަރުކޮށްފައެއް ނުވެއެވެ.

މި މުޒާހަރާތަކާއި ގުޅިގެން ހައްޔަރު ކުރި ދަރިވަރުންގެ އަދަދު:

1) ކޮލަމްބިއާ ޔުނިވާސިޓީ - 133 ދަރިވަރުން

2) ޔުނިވާސިޓީ އޮފް ސަދަން ކެލިފޯނިއާ - 93 ދަރިވަރުން

3) ޔުނިވާސިޓީ އޮފް ޓެކްސަސް - 57 ދަރިވަރުން

4) ނިއުޔޯކް ޔުނިވާސިޓީ - 120 ދަރިވަރުން

5) އެމަރސަން ޔުނިވާސިޓީ - 108 ދަރިވަރުން

6) ޔޭލް ޔުނިވާސިޓީ - 48 ދަރިވަރުން

އެމެރިކާގެ ޔުނިވާސިޓިގެ ދަރިވަރުންގެ އިތުރުންވެސް އެގައުމުގެ ބައެއް ސަރަހައްދުތަކުގެ ހައި ސްކޫލް ދަރިވަރުން ވެސް ޣައްޒާގެ ގަތުލު އާއްމާއި ދެކޮޅަށް އަޑު އުފުލާފައިވާއިރު، ކަމާ ބެހޭ އިދާރާތަކުން ވަނީ ޣައްޒާގެ ގަތުލުއާއްމު ހުއްޓާލުމަށް ގޮވާލުމަށް މި ހަފްތާގެ ހުކުރ ދުވަހު ބޭއްވި ހިނގާލުމުގައި ބައިވެރި ނުވުމަށް ހައި ސްކޫލް ދަރިވަރުންނަށް ވަރަށް އަންގާފައެވެ.