ޤަވާއިދާ ޚިލާފަށް އުޅެމުންދިޔަ ބިދޭސީއަކު ޑީޕޯޓުކުރުމުގެ މަސައްކަތް ފަށައިފިއެވެ.
މިއަދު މާލޭ ސިޓީ ކައުންސިލުން އެކްސްގައި ކުރެއްވި ޕޯސްޓެއްގައި ވިދާޅުވީ، މާލޭ މަގުމައްޗަށް ކުނިއަޅާ ކަން ފާހަގަ ކުރެވިގެން ކައުންސިލުން ހޯދި، ޤަވާއިދާއި ޚިލާފަށް ރާއްޖޭގައި އުޅެމުންދާ މީހަކު މިހާރު ވަނީ ފުލުހުންނާއި ހަވާލުކުރެވިފައި ކަމަށެވެ.
އަދި އިމިގްރޭޝަނާއި ގުޅިގެން ފުލުހުން ދަނީ އެ މީހާ ޑީޕޯޓް ކުރުމުގެ މަސައްކަތް ކުރަމުން ކަމަށްވެސް މާލޭ ސިޓީ ކައުންސިލުން ވިދާޅުވިއެވެ.
މަލޭ ސިޓީ ކައުންސިލުން މައުލޫމާތު ދެއްވި ގޮތުގައި، ފުލުހުންނާ ހަވާލުކޮށްފައިވަނީ ބަންގްލަދޭޝަށް ނިސްބަތްވާ ބިދޭސީއެކެވެ.
ދިވެހިރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ބޮޑުވެފައިވާއިރު، މި މައްސަލައަށް ހައްލެއް ހޯދުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން "އޮޕެރޭޝަން ކުރަނގި" ގެ ނަމުގެ މި މަހުގެ 2 ވަނަ ދުވަހު ޚާއްސަ އޮޕެރޭޝަނެއް ފަށާފައިވާއިރު، މި އޮޕެރޭޝަންގެ ދަށުން، ރާއްޖޭގައި އުޅޭ ހުރިހާ ބިދޭސީންގެ އިނގިލީގެ ނިޝާނާއި ފޮޓޯ ނެގުމަށް ވަނީ ހަމަޖެހިފައެވެ. އަދި ތިން އަހަރު ދުވަހުގެ ތެރޭގައި، ޤަވާއިދާ ޚިލާފަށް އުޅޭ ބިދޭސީންގެ މައްސަލަ މުޅިން ޙައްލުކުރައްވާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
