ބައެއް ޕްރޮޖެކްޓް ތަކުގެ މަސައްކަތް ކުރޮއަށް ނުގޮސް ހުއްޓެނީ ނުވަތަ މަސައްކަތް ލަސްވަނީ އެކަށީގެންވާ ބަޖެޓެއް ކަނޑައެޅިފައި ނުހުންނާތީ ކަމަށް ސްޕޯޓްސް މިނިސްޓަރ އަބްދުالله ރާފިޢު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރު މަޖިލީހަށް ހާޒިރުކޮށްގެން ސުވާލު ކުރުމަށް ހުށަހެޅުނު ފުރުސަތުގައި ބައެއް މެންބަރުން ވަނީ އެ ދާއިރާގެ ރަށް ތަކުގެ ޕްރޮޖެކްޓްތައް 2 އަހަރު ވެގެންދާއިރުވެސް ނުނިމި ހުންނަކަން ފާހަގަކުރައްވާ އެ ޕްރޮޖެކްޓްތައް ނިމޭނެ ތަރީޚް ހާމަކުރެއްވުމަށް ވަޒީރާއި ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ވަޒީރު ރާފިޢު ވިދާޅުވީ، ބައެއް ފަހަރު ޕްރޮޖެކްޓްތައް ލަސްވެގެންދަނީ އެ ޕްރޮޖެކްޓް ހަވާލުކުރެވޭއިރު ބަޖެޓްގައި އެކަމަށް ކަނޑައަޅާފައިވާ މިންވަރު ކުަޑަވުމުން ކަމަށެވެ.
ދެން އަޅުގަމޑުމެން މި ޖެހެނީ މަސައްކަތް ފަށާފައި އެޑްވާންސްއަށް ދައްކަން ޖެހޭ ވަރެއް ދައްކާފައި، ދެވަނަ ޕޭމަންޓަކާ ހަމައަށް އަންނަ އިރު އެ އަހަރު ތެރޭގައި އެހެން ކޯޑަކުން އެ ފައިސާ ބަޖެޓަށް ޓްރާންސްފާ ކުރަން. ދެން އެ ފައިސާ ނަގާ ކޯޑު އެވެސް ކޮންމެސް ރަށެއްގެ ކޮންމެސް ޕްރިޖެކްޓަކަށް ވެފައި މި އޮންނަނީ. އެހެންވާއިރު އެ ރަށުންވެސް އެ ޕްރޮޖެކްޓް ކުރިއަށް ގެންދަން ޖެހޭ. އެހެންވީމާ ވަރަށް ބޮޑަށް ބަޖެޓްގެ ދަތިކަން އެބަ އާދޭ ބަޖެޓް ކުރެވުފައި ހުރި ގޮތުން
ސްޕޯޓްސް މިނިސްޓަރ އަބްދުالله ރާފިޢު
މިއާއެކު ރާފިއު ވިދާޅުވީ ބަޖެޓްގެ ދަތިކަމާއި ހުރެ ޖެހިގެން އަންނަ އަހަރަށް މަސައްކަތް ދަންމާލަން ޖެހޭ ކަމަށާ ލަސްވަނީ އެ ސަބަބާއި ހުރެ ކަމަށެވެ.
އެބަހުރި އިނގޭތޯ ދެ މިލިއަން ތިން މިލިއަންގެ ޕްރޮޖެކްޓަށް ދެ ލައްކަ ތިން ލައްކަވަރު ރުފިޔާ ބަޖެޓްގައި ހިމެނިފައި. އެހެންވީމާ ދެވަނަ ޕޭމަންޓަށް ދާއިރު އެ މަސައްކަތް ކުރިއަށް ގެންދަން ދަތިވޭ. އެއީ އެއް ސަބަބު
ސްޕޯޓްސް މިނިސްޓަރ އަބްދުالله ރާފިޢު
މީގެ އިތުރުން ޕްރޮޖެކްޓަށް ވޭނުންވާ ތަކެއްޗަށް އޯޑަރ ދީގެން އެ ގެންނަން ނަގާ ވަގުތުގެ ސަބަބުންވެސް މަސައްކަތް ލަސްވެގެންދާ ކަމަށް ވަޒީރު ވިދާޅުވިއެވެ.
އަދި ހަމަ އެހެން، ދެތިން ސަބްކޮންޓްރެކްޓަރުންނާއި ހަވާލު ކޮށްގެންވެސް ބައެއް މަސައްކަތް ކުރިއަށް ގެންދާއިރު އޭގެ ސަބަބުން އެއްބަޔަކާ އަނެއް ބައެއްގެ މެދުގައި “ކޮމިޔުނިކޭޝަން އެރާރ” އަރާތީވެސް މަސައްކަތް ލަސްވާ ކަމަށް ވަޒީރު ރާފިޢު ވުދާޅުވިއެވެ.
އެހެންކަމުން އެ ހުރިހާ ކަމެއްވެސް ކޮންޓްރެކްޓަރ އާއި ވާހަކަ ދައްކައިގެން ސާފުކޮށް މަސައްކަތް ލަސްވާ ސަބަބު ދެނެގަތުމުގެ މަސައްކަތް އެ ވުޒާރާއިން ކުރަމުންދާ ކަމަށް ރާފިޢު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
