އެޗު ނޯވ ކޮމްޕެނީ ޕްރައިވެޓް ލިމިޓެޑުގެ ފަރާތުން އިންތިޒާމުކޮށް ރ.އަތޮޅު އިނގުރައިދޫ ދާއިރާއަށް ހުޅުވާލައިގެން "މައްޔާ ފުޓްސަލް ވާދަ 2024" ގެ ނަމުގައި ފުޓްސަލް މުބާރާތެއް ބޭއްވުމަށް ނިންމައި ބައިވެރިވުމަށް ފުރުސަތު ހުޅުވާލައިފިއެވެ.

އެޗު ނޯވ ކޮމްޕެނީގެ ފަރާތުން އަލީ ހާފިޒް (ހާއްޕެ) ވޮއިސް ސްޕޯޓްސް އަށް މައުލޫމާތު ދިންގޮތުގައި ޖޫން 16 ވަނަ ދުވަހު ފެށުމަށް ހަމަޖެހިފައިވާ މިމުބާރާތުގައި މިއަހަރު ފުރުސަތު ދިނުމަށް ހަމަޖެހިފައިވަނީ ޖުމްލަ 10 ޓީމަށެވެ.

އޭގެތެރޭގައި އިނގުރައިދޫއަށް 6 ޖާގަ އަދި ފައިނު، ކިނޮޅަސް، އިންނަމާދޫގެ އިތުރުން ރަސްމާދޫ މިއިން ކޮންމެ ރަށަކަށް އެއް ޓީމު ބައިވެރިކުރުމުގެ ފުރުސަތު ދިނުމަށް ވަނީ ހަމަޖެހިފައެވެ. އަދި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެތިވާ ޓީމުތައް ދެގުރޫޕަކަށް ބަހާލައިގެންނެވެ. ކޮންމެ ގުރޫޕްކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

އިތުރަށް ވާހަކަދައްމުން ހާއްޕެ ބުނީ އެޗު ނޯވ ކޮމްޕެނީގެ ފަރާތުން މިފަދަ މުބާރާތެއް ބޭއްވުމުގެ މަގުސަދަކީ އިނގުރައިދޫގެ ޒުވާނުންގެ މެދުގައި ފުޓްސަލްގެ ފޯރިގަދަކޮށް، މިދާއިރާގައި ހިމެނޭ ފައިނު، ކިނޮޅަސް، އިންނަމާދޫގެ އިތުރުން ރަސްމާދޫގެ ޒުވާންގެ މެދުގައި އެކުވެރިކަން އާލާކުރުމުގެ އިތުރުން، ކުޅިވަރުގެ ތެރެއިން ދުޅަހެޔޮ މުޖުތަމައެއް ބިނާކުރުމަށް މިދާއިރާގެ ޒުވާނުންނަށް އިތުރު ފުރުސަތުތަކެއް ހޯދައިދިނުމެވެ.

މިއަހަރުގެ މުބާރާތުގައި ބައިވެރިވުމުގެ ފުރުސަތު އިނގުރައިދޫ، ފައިނު، ކިނޮޅަސް، އިންނަމާދޫގެ އިތުރުން ރަސްމާދޫއަށް ދިން ނަމަވެސް ކުރިއަށް އޮތްތަނުގައި މުބާރާތް އިތުރަށް ފުޅާކޮށް މުޅި އަތޮޅަށް ހުޅުވާލުން ވިސްނުމަކީ ހާއްޕެ ބުންޏެވެ.

ޗެންޕިއަން ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ބައިވެރިވުމުގެ ފުރުސަތު ހުޅުވާލެވިފައި ވަނީ މިމަހުގެ 20 ވަނަ ދުވަހުގެ ނިޔަލަށެވެ.