"ރާބަދި ޗެލެންޖް 2024" ގެ ސެމީ ފައިނަލް ދެވަނަ މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން ޖޯލި ބީއިންގ ބަލިކޮށް އެންމެ ފަހުގެ ރަނަރަޕް ދިގަލި މޯލްޑިވްސް މުބާރާތުގެ ފައިނަލުން ޖާގަ ހޯދައިފިއެވެ.

މުބާރާތުގެ ފެށުން ދިގަލި މޯލްޑިވްސް އަށް އާދައިގެ ގޮތަކަށް ދިޔަ ނަމަވެސް މެޗަކަށްފަހު މެޗެއްގައި އެޓީމުން އަނީ ކުޅުން ރަނގަޅުކުރަމުންނެވެ. އަދި އެޓީމު ސެމީ ފައިނަލުން ޖާގަ ހޯދީ ކުއާޓާ ފައިނަލުގައި 4-0 ގެ ނަތީޖާއަކުން  ކޮތައިފަރު ބަލިކުރުމަށްފަހު އެވެ.

ޖޯލި ބީއިންގ މުބާރާތުގެ ފައިނަލުން ޖާގަ ހޯދީ ކުއާޓާ ފައިނަލުގައި މީދުއްޕަރާއި ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވެ ނަތީޖާ ނެރުމަށްޓަކައި ޖެހި ޕެނަލްޓީގައި 5-3 ގެ ނަތީޖާއަކުން މީދުއްޕަރު ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ދިގަލި މޯލްޑިވްސް އިންނެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ދިގަލި މޯލްޑިވްސް ކުރީގައި އޮވެގެންނެވެ.

މީގެ އިތުރުން ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މިހާފުގައި ދެޓީމުންކުރެ ކޮންމެ ޓީމަކުން ވެސް ވަނި އެއްލަނޑު ކާމިޔާބުކޮށްފައެވެ. 

އެގޮތުން މިމެޗުގައި ދިގަލި މޯލްޑިވްސްގެ މުހައްމަދު މަމްދޫހް އާއި އަހުމަދު ފިރުޝާން މިއިން ކޮންމެ ކުޅުންތެރިއެއް ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ޖޯލި ބީއިންގެ ހަމައެކަނި ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ މުހައްމަދު ޝައްމާހް އެވެ. އަދި މިމެޗުގެ މޭން އޮފް ދަ މެޗަކަށް ހޮވިފައިވަނީ ދިގަލި މޯލްޑިވްސްގެ މުހައްމަދު މަމްދޫހު އެވެ.

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަ ރިސޯޓް ފުޓްސަލް ޗެލެންޖުގައި މިއަހަރުގެ 14 ޓީމެއް ބައިވެރިވެފައިވާއިރު މުބާރާތް ކުރިއަށް ދަނީ ބައިވެރިވި 14 ޓީމު ހަތަރު ގުރޫޕަކަށް ބަހާލައިގެންނެވެ.

އެގޮތުން ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ. އަދި މުބާރާތުގެ ކުއާޓާ ފައިނަލް މެޗުތައްނިމުނުއިރު، ސެމީ ފައިނަލުން ޖާގަ ހޯދާފައި ވަނީ ޖޯލި ބީއިންގެ އިތުރުން ކޯރާ ކޯރާ، ކުޑަފުށި އަދި ދިގަލި މޯލްޑިވްސް އެވެ.

މީގެ އިތުރުން މުބާރާތުގެ ސެމީ ފައިނަލް ނިމި ފައިނަލަށް ދެޓީމު ހޮވިފައިވާއިރު، މާދަމާ ރޭ ކުޅެވޭ މުބާރާތުގެ ފައިނަލުގައި އެންމެ ފަހުގެ ރަނަރަޕް ދިގަލި މޯލްޑިވްސް އިން ނުކުންނީ ކޯރާ ކޯރާ މޯލްޑިވްސް އާއި ދެކޮޅަށެވެ. އަދި މީގެ ކުރިން ދެފަހަރު ފައިނަލުގައި ކުޅެ 2019 ދިގަލި މޯލްޑިވްސް އިން މުބާރާތުގެ ޗެންޕިއަންކަން ހޯދާފައިވާއިރު، މިއީ ކޯރާ ކޯރާ މޯލްޑިވްސް އިން ފައިނަލުގެ ޖާގަ ހޯދި ފުރަތަމަ ފަހަރެވެ.