ހައްދުފަހަނަ އަޅާފައިވާ އިސްރާއީލުން ޣައްޒާގެ ރަފާހް އަށް އަރައިގަނެ ހަމަލާދޭން ފެށުމާއި އެކު އެމެރިކާއިން އެގައުމަށް ހަތިޔާރު ފޯރުކޮށްދިނުން ވަގުތީ ގޮތުން ހުއްޓާލައިފިއެވެ.

އެގޮތުން އެމެރިކާގެ އޮފިޝަލަކު ބުނީ، މިދިޔަ އޭޕްރިލް މަހު ޔަހޫދީ ފައުޖުން ރަފާހަށް ވަދެގަތުމަށް ނިންމިކަމަށް ލިބުނު ހަބަރާއި ގުޅިގެން އޭރުން ފެށިގެން ވެސް އިސްރާއީލުން ރަފާހް އަށް ހަމަލާ ދިނުމަށް ބޭނުންކޮށްފާނެ ހަތިޔާރު ތަކާއި ގުޅޭ ގޮތުން ފަރުވާތެރި ކަމާއި އެކު މުރާޖައާ ކުރަން ފެށިކަމަށެވެ.

އެއާއި ގުޅިގެން އެމެރިކާއިން އިސްރާއީލަށް ހަތިޔާރު ފޯރުކޮށްދިނުން މިދިޔަ ހަފްތާގެ ތެރޭގައި މެދުކަނޑާލާފައިވާއިރު، އޭގެ ތެރޭގައި 1,800 2,000 ޕައުންޑް ގެ ބޮން އަދި 500 1،700 ޕައުންޑް ގެ ބޮން ހިމެނެއެވެ.

Advertisement

އެމެރިކާގެ އޮފިޝަލް ބުނީ 2،000 ޕައުންޑްގެ ބޮންތައް ފޮނުވުމާއި އިސްރާއީލުން އެ ބޮން ތައް ބޭނުންކުރުވުން ހުއްޓުވުމަށް އަމާޒު ހިފާފައިވާ ކަމަށާއި، ބޭނުމަކީ އެ ބޮމުގެ ސަބަބުން ޣައްޒާގެ އެހެން ހިސާބުތަކަށް ކުރި އަސަރުތައް ހުއްޓުވުން ކަމަށްވީ ނަމަވެސް، މިކަމާއި ގުޅިގެން އަދި ވަކި ގޮތަކަށް ނިންމާފައިނުވާ ކަމަށެވެ.

މަސްދަރުތަކުން މައުލޫމާތުދޭ ގޮތުގައި އިސްރާއީލަށް ހަތިޔާރު ފޯރުކޮށްދިނުން 2 ހަފްތާއަށް އެމެރިކާއިން މަޑުޖައްސާލި އިރު، އޭގެ ތެރޭގައި އަމާޒަށް ބޮން ފޮނުވާ އަދި ކުދި ބޮންތައް އެކުލެވޭގޮތަށް ބޮއިންގް އިން އުފައްދާފައިވާ ޖޮއިންޓް ޑައިރެކްޓް އެޓޭކް މުނިޝަންސް ވެސް ހިމެނެއެވެ.

ޔަހޫދީ ފައުޖުން ރަފާހް އަށް އެރުމާއި ދެކޮޅަށް މުޅި ދުނިޔެއިން ވެސް އިންޒާރު ދެމުންދަނިކޮށް، ހައްދުފަހަނައަޅާފައިވާ އިސްރާއީލުގެ ފައުޖުގެ ޓޭންކަރުތައް ވަނީ އިއްޔެ ރަފާހް އަށް ވަދެގަނެ، ރަފާހްގެ ބޯޑަރުގެ ކޮންޓްރޯލް ނަގާފައެވެ.

ޔަހޫދީ ފައުޖުން ޣައްޒާ އާއި މިޞްރާއި ދެމެދު އޮންނަ މި ބޯޑަރުގެ ކޮންޓްރޯލް ނަގާފައިވާއިރު، މިއީ އިންސާނީ އެހީތެރިކަން ފޯރުކޮށްދިނުމަށް މިސްރާއި ޣައްޒާއާ ދެމެދު އޮންނަ ހަމައެކަނި ދޮރުކަން ފާހަގަކޮށްލަން ޖެހެއެވެ.

ޔަހޫދީން ރަފާހް އަށް އަރައިގައިންފައިމިވަނީ ޣައްޒާގައި ހިންގަމުންދާ ގަތުލުއާއްމު ހުއްޓާލުމާއި ގުޅޭ ގޮތުން މުހިންމު މަޝްވަރާތަކެއް ކުރެވި، ހަމާސް އިން މިހަނގުރާމަ ހުއްޓާލުމަށް އެއްބަސްވުމަށް ނިންމާފައިވަނިކޮށެވެ.