ޔަހޫދީ ފައުޖުން ރަފާހަށް ހަމަލާ ދޭން ފަށައިފިނަމަ އެމެރިކާއިން އިސްރާއީލަށް ހަތިޔާރުތައް ފޯރުކޮށްދިނުން ހުއްޓާލާނެ ކަމަށް ބުނެ އެމެރިކާގެ ރައީސް ޖޯ ބައިޑެން ދިން އިންޒާރާއި އެކު ވެސް އިސްރާއީލުގެ އަނިޔާވެރި ބޮޑު ވަޒީރު ބެންޖަމިން ނަތަންޔާހޫ ގަތުލުއާއްމު ހުއްޓާލުމަށް ދެކޮޅު ހަދައިފިއެވެ.

އެގޮތުން ނަތަންޔާހޫ ބުނީ، އިސްރާއީލުން އެކަނިވެސް ހަމާސް ބަލި ކުރެވޭނެ ކަމަށާއި، ގަތުލުއާއްމު ހުއްޓާލާނީ ހަމާސް ޖަމާއަތް އެއްކޮށް ބަލި ކުރުމަށްފަހުކަމަށެވެ.

ނަތަންޔާހޫ މިފަދައިން ބުނި ނަމަވެސް އޭނާގެ ސަރުކާރަށް ވަނީ އެމެރިކާއިން ހަތިޔާރު ފޯރުކޮށްދިނުން މެދުކަނޑާލުމާއި ގުޅިގެން ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ. މިގޮތުން އެމެރިކާއިން ވަނީ 1,800 2,000 ޕައުންޑާއި، 1,700 500 ޕައުންޑް ގެ ބޮން އިސްރާއީލަށް ފޯރުކޮށްދިނުން ހުއްޓާލާފައެވެ.

ހަމައެއާއިއެކު، އިސްރާއީލަށް އެމެރިކާއިން ފޮނުވުމަށް ހަމަޖެހިފައިވާ  އަމާޒަށް ބޮން ފޮނުވާ އަދި ކުދި ބޮންތައް އެކުލެވޭގޮތަށް ބޮއިންގް އިން އުފައްދާފައިވާ ޖޮއިންޓް ޑައިރެކްޓް އެޓޭކް މުނިޝަންސް ވެސް އޭގެ ތެރޭގައި ހިމެނޭއިރު، މިކަމާއި ގުޅިގެން އެމެރިކާގެ އޮފިޝަލަކު ބުނީ 2،000 ޕައުންޑްގެ ބޮންތައް ފޮނުވުމާއި އިސްރާއީލުން އެ ބޮން ތައް ބޭނުންކުރުވުން ހުއްޓުވުމަށް އަމާޒު ހިފާފައިވާ ކަމަށާއި، ބޭނުމަކީ އެ ބޮމުގެ ސަބަބުން ޣައްޒާގެ އެހެން ހިސާބުތަކަށް ކުރި އަސަރުތައް ހުއްޓުވުން ކަމަށްވީ ނަމަވެސް، މިކަމާއި ގުޅިގެން އަދި ވަކި ގޮތަކަށް ނިންމާފައިނުވާ ކަމަށެވެ.

ރަފާހަށް ޔަހޫދީ ފައުޖުން އަރައިގަނެ ރަފާހް ގެ ބޯޑަރުގެ ކޮންޓްރޯލް ވެސް ނަގާފައެވެ. މިއީ ޣައްޒާ އަށް އެހީ ވެއްދުމަށް ބޭނުންކުރާ މައި ސަރަހައްދަކަށް ވާއިރު، އެހީ ވެއްދުމަށް މި ސަރަހައްދު ހުޅުވާލި ކަމަށް ޔަހޫދީ ފައުޖުން ބުނި ނަމަވެސް އދ އިން ވަނީ މިވާހަކަތައް ދޮގު ކޮށްފައެވެ.

ޔަހޫދީން ގެ މި އަނިޔާވެރި އަމަލާއި ގުޅިގެން ޣައްޒާގައި ދިރިއުޅެމުންދާ 2.3 މިލިއަން އާއްމުން ވަނީ ބޯފެނާއި ކާނާ އާއި ސިއްހީ ތަކެތި ފަދަ އެހީތައް ލިބުމުން މަހުރޫމް ވެފައެވެ. 

ޣައްޒާ އަށް އެހީ ފޯރުކޮށްދިނުމަށް މުޅި ދުނިޔެއިން ގޮވާލަމުން ދާއިރު، ދުނިޔޭގެ ސިއްހަތާއި ބެހޭ ޖަމިއްޔާއިން ވަނީ ތިން ދުވަހުގެ ތެރޭގައި ޣައްޒާގެ ހޮސްޕިޓަލް ތަކުގައި ބޭނުންކުރާ ތެޔޮ ހުސްވާނެ ކަމަށް އިންޒާރު ވެސް ދީފައެވެ. އެތައް ގައުމަކުން އިންޒާރު ދެމުންދަނިކޮށް ޔަހޫދީން ރަފާހް އަށް އަރައިގަތުމަކީ ޣައްޒާ ގައި ކުރިއަށްދާ އެހީގެ އޮޕަރޭޝަން ތަކާއި މިހާރު ފޯރުކޮށްދެމުން އަންނަ އިންސާނީ އެހީ އެއްކޮށް ހުއްޓޭނެ ކަމެއް ކަމަށް ކަމާ ބެހޭ ފަރާތްތަކުން ވަނީ ބުނެފައެވެ.

އިސްރާއީލުން ރަފާހަށް ދެމުންގެންދާ ލާއިންސާނީ ހަމަލާތައް ހުއްޓާ ނުލައި ކުރިއަށް ގެންދާއިރު، ހަމަލާ ތަކާއި ގުޅިގެން މިހާތަނަށް ރަފާހް ގައި ބޯހިޔާވަހިކަން ހޯދަމުން އަންނަ 8،000 ފަރާތެއް ވަނީ އެ ހިސާބު ދޫކޮށް ގޮސްފައެވެ.