ދިވެހި ފުލުހުން ހިދުމަތުން ރައްޔިތުންނާއި  މައުލޫމާތުތައް ހިއްސާކުރަނީ ކޯޓުގެ ހުރުމަތްކަނޑާލައި، ކޯޓުތަކާއި ޗެލެންޖްކުރާކަށް ނޫންކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ، ރާއްޖޭގެ ކޯޓުތަކާއި މިނިސްޓްރީއާ އޮންނަ ގުޅުން ރަނގަޅު ކަމަށާއި މިނިސްޓްރީން މަސައްކަތް ކުރަމުންދަނީ ކޯޓުތަކާ ގުޅިގެން ކަމަށްވާއިރު، ކޯޓުތަކާ ޗެލެންޖު ކުރުމަށް އެއްވެސް ކަމެއް ނުކުރާ ކަމަށެވެ.

ވަޒީރު އިހުސާން ވިދާޅުވީ، ފުލުހުންގެ މުއައްސަސާ ހިމެނޭހެން ދައުލަތުގެ އެއްވެސް އިދާރާއަކުން ދުވަހަކު ވެސް ކޯޓަކާއި ޗެލެންޖެއް ނުކުރާނެ ކަމަށެވެ.

ވަޒީރު އިހުސާން ވިދާޅުވީ، ރައްޔިތުންގެ ތެރެއިން ގިނަ މީހުންގެ ކަންބޮޑުވުން އޮތް ބޮޑެތި މައްސަލަ ތަކުގައި، އެ މައްސަލައިގައި ހިމެނޭ މައުލޫމާތުތައް ހިއްސާ ކުރުމަކީ ޕްރޮސީޖަރަލީ ކުރަން ނިންމި ކަމެއްކަމަށާއި، ފުލުހުންނަކީ ވަކި މުއައްސަސާއަކަށްވެފައި ރައްޔިތުންނަށް ޖަވާބުދާރީވާން ކަނޑައަޅާފައި ހުންނަ އުސޫލުތަކެއް ހުންނާތީ ފުލުހުން އެ މައުލޫމާތުތައް ރައްޔިތުންނަށް އާންމު ކުރަމުން ދާނެ ކަމަށެވެ.

ހުކުމްކޮށް ނިންމާފައިވާ މައްސަލައެއްގެ މައުލޫމާތުތައް ރައްޔިތުންނާއި ހިއްސާ ކުރުމަކީ އެ މައްސަލައިގައި ކޮށްފައިވާ ހުކުމަށް އަސަރުކުރާނެ ކަމެއް ކަމުގައި ދެކިވަޑައިގަނުގަންނަވާ ކަމަށާއި، ކޯޓުން ހުކުމް ކުރުމަށްފަހު އެ ކޭސް އަށް އާ ހެކިތައް ވެސް ހުށައެޅުމަކީ އޮންނަ ކަމެއް ނޫންކަން ވަޒީރު އިހުސާން ފާހަގަކުރެއްވިއެވެ.

މިފަދައިން ވަޒީރު ވިދާޅުވެފައިވާއިރު، 119 ކިލޯގެ މަސްތުވާތަކެތީގެ މައްސަލައިގައި ދައުވާކުރި މީހާގެ މައްޗަށް ކުށް ސާބިތުނުވާ ކަމަށް ކޯޓުން ނިންމުމުން، އެ ތަހުގީގުގެ މައުލޫމާތު ފުލުހުން އާންމު ކުރުމާއި ގުޅިގެން މިދިޔަ މަހު ކްރިމިނަލް ކޯޓުން ވަނީ އެ ކޯޓުގެ ހުރުމަތް ކަނޑާލާ ނޫސްވެރިންނަށް މައުލޫމާތު ދިން ކަމަށް ބުނެފައެވެ.