ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ކުރީގެ ޑެޕިއުޓީ ކޮމިޝަނަރ އޮފް ޓެކްސޭޝަން ހަސަން ޒަރީރު އައްޔަން ކުރެއްވުމަށް ރައްޔިތުންގެ މަޖިލީހުގެ ފާސްކޮށްފިއެވެ.
އެއާއެކު ޒަރީރަށް އެ މަގާމަށް ރުހުން ދިނުމާމެދު މިއަދުގެ މަޖިލީހުގެ ޖަލްސާގައި ވޯޓު ނަގާފައިވާއިރު، އޭނާ އެ މަގާމަށް އައްޔަނުކުރަން ފެންނަ ކަމަށް 45 މެންބަރުން ވަނީ ވޯޓު ދީފައެވެ. ޒަރީރު އައްޔަންކުރުމާ ދެކޮޅަށް އެއްވެސް މެންބަރަކު ވޯޓު ދީފައެއް ނުވެއެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަގާމު ހުސްވެފައިވަނީ އެ މަގާމުގައި ހުންނެވި ފަތުހުالله ޖަމީލް އިސްތިއުފާ ދެއްވުމާ ގުޅިގެންނެވެ.
އެހެން ކަމުން އެ އެ މަގާމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެ ނަމެއް މަޖިލީހަށް ފޮނުއްވާފައެވެ. އެއީ ކުރިން އެ މަގާމުގައި ހުންނެވި ޔަޒީދު މުޙައްމަދުގެ ނަންފުޅާއި ޒަރީރުގެ ނަންފުޅެވެ.
މަޖިލީހުގެ އިގްތިސާދީ ކޮމިޓީން ދެ ބޭފުޅުންނާ ވެސް އިންޓަވިއުކުރުމަށްފަހު ވަކިވަކިން ދެ ބޭފުޅުންނަށް ރުހުން ހޯދުމަށް ވޯޓު ނަގާފައިވާއިރު ޒަރީރަށް ރުހުން ދިނުމަށް ފާސްވެފައިވަނީ ކޮމިޓީއަށް ހާޒިރުވެވަޑައިގެންނެވި މެންބަރުންގެ ތެރެއިން 10 މެންބަރުންގެ ވޯޓުންނެވެ. ޔަޒީދު އައްޔަން ކުރެއްވުމަށް ވޯޓު ދެއްވީ ހަތަރު މެންބަރުންނެވެ.
ޒަރީރަކީ ބޭންކް އޮފް މޯލްޑިވްސްގެ ޗެއާޕާސަންގެ މަގާމު ވެސް އަދާކުރައްވާ ބޭފުޅެކެވެ. އޭނާ އެ މަގާމަށް އައްޔަން ކުރެއްވީ މާޗު މަހުގެ 25ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
