މޫސުންގޯސްވެ ވައިގަދަވުމާއި ގުޅިގެން އިންޑިއާގެ މުމްބާއިގައި ހުރި ބޮޑު ބިލްބޯޑެއް ވެއްޓި 14 މީހުން މަރުވެއްޖެއެވެ.
ދިގު މިނުގައި 70 މީޓަރު އަދި ފުޅާ މިނުގައި 50 މީޓަރު ހުރި މި ބިލްބޯޑު ވެއްޓިފައިވަނީ އެ ސަރައްހައުގައިވާ ގެތަކަށާއި ޕެޓްރޯލް ސްޓޭޝަނަކަށެވެ.
މި ހާދިސާގައި 14 މީހުން މަރުވުމުގެ އިތުރުން 74 މީހަކު ޒަޚަމުވެފައިވާ ކަމަށާއި، އަދިވެސް ބައެއް މީހުން ބިލްބޯޑުގެ އަޑީގައި ތާށިވެފައިވާތީ އެމީހުން ސަލާމަތްކުރުމުގެ މަސައްކަތް ކުރަމުން އަންނަ ކަމަށް އެގައުމުގެ ފުލުހުން މައުލޫމާތުދެއެވެ.
ބިލްބޯޑުގެ ދަށުގައި ތާށިވެފައި ތިބި މީހުން ސަލާމަތް ކުރުމުގެ މަސައްކަތުގެ ތެރެއިން-- ފޮޓޯ: ރޮއިޓާސް
މި މައްސަލަ ތަހުގީގު ކުރުމަށް މުމްބާއީ ހުންނަ މަހާރާޝްތުރާ ސްޓޭޓްގެ ސަރުކާރުން އަންގާފައިވާއިރު، ދައުރުވަމުންދާ ވީޑިއޯ ތަކުން ފެންނަ ގޮތުގައި ގަދަ ވައިގެ ސަބަބުން މި ބިލްބޯޑު ވެއްޓޭއިރު، އެ ސަރަހައްދުގައި ހުރި އުޅަނދުތަކަށް ވެސް ބޮޑެތި ގެއްލުން ތަކެއް ވަނީ ލިބިފައެވެ.
މުމްބާއީ އަށް މިހާރު ކުރަމުންދާ ވިއްސާރައިގެ ސަބަބުން ބައެއް ހިސާބުތަކަށް ގަޑިއަކު 40-50 ކިލޯމީޓަރަށް ވައިގަދަވެ، އާދައިގެ ވަރަކަށް ވާރޭ ވެހޭނެ ކަމަށް މުމްބާއީގެ މޫސުމާބެހޭ ޑިޕާޓްމަންޓުން ލަފާކޮށްފައިވާއިރު، ވިއްސާރައިގެ ސަބަބުން މުމްބާއީ އެއާޕޯޓުގައި ފްލައިޓްތަކުގެ ދަތުރުތައް ވެސް ވަނީ މެދުކަނޑައިލައިފައެވެ.
Advertisement
This content is created and paid for by advertisers and does not involve Voice Journalists
