ޔަހޫދީން ޣައްޒާއަށް އެހީ ވެއްދުމާއި ދެކޮޅަށް އަޅާފައިވާ ފިޔަވަޅުތަކުގެ ސަބަބުން ޣައްޒާގައި ތެލުގެ ދަތިކަން ބޮޑުވެ، ސިއްހީ ނިޒާމު މަދު ގަޑިއިރުތަކެއްގެ ތެރޭގައި ހުއްޓިދާނެ ކަމުގެ އިންޒާރު ޣައްޒާގެ ހެލްތު މިނިސްޓްރީން ދީފިއެވެ.

ޣައްޒާގެ ހެލްތު މިނިސްޓްރީން ނެރުނު ނޫސްބަޔާނެއްގައި ބުނީ ޣައްޒާގެ ހޮސްޕިޓަލްތަކުގެ ޖަނަރޭޓަރުތަކާއި، އެމްބިއުލާންސްތަކާއި، ސިއްހީ މުއައްޒަފުން ހަރަކާތްތެރިވާ ތަންތަނަށް ކަރަންޓް ދިނުމަށް ބޭނުންވާ ތެޔޮ ނުލިބޭތީ، މަދު ގަޑިއިރުތަކެއްގެ ތެރޭގައި ސިއްހީ ނިޒާމު އެއްކޮށް ހުއްޓޭނެ ކަމަށެވެ.

މީގެ ހަތް މަސް ކުރިން ޔަހޫދީ ފައުޖުން ޣައްޒާ އަށް ދޭން ފެށި ހަމަލާތަކާއި އެކު، ޒަހަމްވާ ފަރާތްތަކަށް ފަރުވާ ދިނުމަށް ވެސް ބޮޑެތި ދަތިތަކެއް ހުރިކަން ފާހަގަކޮށް ހެލްތު މިނިސްޓްރީން އިތުރަށް ބުނީ، އެހާ ގިނަ އަދަދެއްގެ މީހުންނަށް ފަރުވާދޭން ޖެހޭ އިރު، އެކަމަށްޓަކައި ސިއްހީ މުއައްޒަފުން ޣައްޒާގައި ރެޔާއި ދުވާލު އަރާމެއް ނެތި ހަރަކާތްތެރިވަމުން އަންނަ ކަމަށެވެ.

Advertisement

ޣައްޒާގެ ހޮސްޕިޓަލް ތަކަށް ވެސް ޔަހޫދީ ފައުޖުން ހަމަލާ ދެމުން އަންނައިރު، މި މަހުގެ 5 ވަނަ ދުވަހު އެމީހުން ވަނީ ޣައްޒާ އަށް އެހީ ވެއްދުމަށް ބޭނުންކުރަމުން އައި މައި ބޯޑަރެއް ކަމަށްވާ ކެރެމް ޝަލޮމް ގެ ކޮންޓްރޯލް ނަގައި ޣައްޒާއަށް އެހީ ވެއްދުމަށް އިތުރަށް ދަތިތައް ކުރިމަތި ކުރުވާފައެވެ.