ހުޅުމާލޭގެ 2 ވަނަ ފިޔަވަހީގެ ބީޗް ސަރަހައްދުގައި ހަދާފައިވާ ހަޓްތައް ނަގަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފި އެވެ.
މިއަދު އެޗްޑީސީއިން ނެރުނު ބަޔާނެއްގައި ބުނެފައި ވަނީ ހުޅުމާލޭގެ 2 ވަނަ ފިޔަވީގެ ރުއްގަނޑު 3 ގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓްތަކާއި އެތާނގައި ބަހައްޓާފައިވާ ތަކެތި ނަގަން އަންގާކަމަށެވެ. އެގޮތުން ހަޓްތަކާއި އެހެނިހެންވެސް ތަކެތި ނަގަން އެޗްޑީސީއިން ސުންގަޑިއަކަށް ދީފައިވަނީ މިމަހުގެ 30 ވަނަ ދުވަހެވެ.
އެޗްޑީސީއިން އިތުރަށް ބުނެފައިވަނީ، ދެވިފައިވާ މުއްދަތުގައި އެ ތަކެތި ނަގާފައި ނުވާނަމަ، އެ ތަކެތި ނަގައި ސަރަހައްދު ސާފުކުރުމުގެ މަސައްކަތް އެޗްޑީސީއިން ކުރިއަށް ގެންދާނެ ކަމަށެވެ. އަދި ސާފުކުރުމުގެ މަސައްކަތުގެ ތެރެއިން އެއްވެސް އެއްޗަކަށް ލިބޭ ގެއްލުމަށް އެ ކޯޕަރޭޝަނުން ޒިންމާ ނުވާނެކަމުގައިވެސް އެޗްޑީސީއިން ވަނީ ބުނެފައެވެ.
އެޗްޑީސީއިން ހާމަކުރެއްވި ގޮތުގައި އެ ސަރަހައްދުގައި ވަގުތީގޮތުން ހަދާފައިވާ ހަޓްތައް ނަގަން އެންގީ، އެ ސަރަހައްދު އިތުރަށް ތަރައްގީކުރުމަށް ކުރަންޖެހޭ މަސައްކަތްތައް ކުރުމަށެވެ.
މީގެ އިތުރުން، އެ ބީޗް ސަރަހައްދަކީ ތަރައްގީ ކުރުމުގެ މަރުހަލާގައި އޮތް ތަނަކަށްވެފައި ވަސީލަތްތައް ވެސް ގާއިމުވެފައި ނެތުމުން ގިނަ ދަތިތަކެއް ކުރިމަތިވާ ކަމަށާއި އެ ތަން މިހާރު ބޭނުންކުރަމުންދާ ގޮތުން އެތަން ސާފުކޮށް ބެލެހެއްޓުމަށް ވެސް ދަތިވެފައިވާ ކަން ފާހަގަ ކުރައްވާ އެޗްޑީސިއިން ބުނީ، އެ ސަރަހައްދު އިތުރަށް ތަރައްގީކޮށް، ވަސީލަތްތައް ގާއިމުކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
