އިސްރާއީލުން ރަފާހަށް ވަދެގަނެ، ރަފާހް ގެ ބޯޑަރު ނެގުމާއިއެކު ހަނގުރާމަ ހުއްޓާލުމަށް ހަމާސް ޖަމާއަތާއި ހައްދުފަހަނަ އަޅާފައިވާ އިސްރާއީލާއި އެކު ކުރިއަށް ދިޔަ މަޝްވަރާތައް ހުއްޓިފައިވާކަމަށް ގަތަރުގެ ބޮޑުވަޒީރު ޝެއިހް މުހައްމަދު ބިން އަބްދުއްރަހްމާން އަލް ތާނީ ވިދާޅުވެއްޖެއެވެ.

އިސްރާއީލުން ރަފާހަށް ހަމަލާދޭން ފަށާފައިވަނީ ޣައްޒާގައި ހިންގަމުންދާ ގަތުލުއާއްމު ހުއްޓާލުމާއި ގުޅޭ ގޮތުން މުހިންމު މަޝްވަރާތަކެއް ކުރެވި، ހަމާސް އިން މިހަނގުރާމަ ހުއްޓާލުމަށް އެއްބަސްވުމަށް ނިންމާފައިވަނިކޮށްކަން ފާހަގަކޮށްލަން ޖެހެއެވެ.

ދޯހާގައި ބޭއްވި އިގްތިސާދީ ފޯރަމެއްގައި މިކަމާއި ގުޅޭގޮތުން ވާހަކަފުޅު ދައްކަވަމުން ގަތަރު ބޮޑުވަޒީރު ވިދާޅުވީ، ވޭތުވެދިޔަ ހަފްތާތަކުގައި އެ މަޝްވަރާތަކަށް އަލިކަމެއް ފެނިގެންދިޔަ ނަމަވެސް ކަންކަން މިސްރާބުޖެހީ ރަނގަޅު ދިމާލަކަށްނޫން ކަމަށާއި، ނަތީޖާއެއްގެ ގޮތުން އެ މަޝްވަރާތައް ހުއްޓާލަން ޖެހިފައިވާ ކަމަށެވެ.

އެހެންނަމަވެސް، އަދިވެސް ގަތަރުގެ އަމާޒަކީ ހަނގުރާމަ ހުއްޓުވުމާއި ގުޅޭ މަޝްވަރާތަކުގެ މެދުވެރިއެއްގެ ގޮތުގައި މަސައްކަތްކޮށް، ގަތުލުއާއްމު ނިމުމަކަށް ގެނައުން ކަމަށް ޝައިޚް މުހައްމަދު ވިދާޅުވިއެވެ.

ޔަހޫދީ ފައުޖުން ރަފާހަށް އަރައިގެންފައިވާއިރު، އެއީ ޣައްޒާގައި ހިންގަމުންދާ ގަތުލުއާއްމާއި ގުޅިގެން މިލިއަނަކަށް ވުރެ ގިނަ މީހުން ބޯހިޔާވަހިކަން ހޯދަމުން އަންނަ ސަރަހައްދެކެވެ.

ރަފާހަށް އަރައިގަނެ އެ ސަރަހައްދުގެ ބޯޑަރގެ ކޮންޓްރޯލް ވެސް ޔަހޫދީން ނަގާފައިވާއިރު، އެއީ ޣައްޒާ އަށް އެހީވެއްދުމަށްޓަކައި ބޭނުންކުރާ މައި ދޮރޯއްޓެކެވެ. އެއާއިއެކު، ޣައްޒާ އަށް އެހީގެ އިތުރުން ތެޔޮ ވެސް ނުވެއްދޭތީ ޣައްޒާގެ ސިއްހީ ނިޒާމް ވެސް މަދު ވަގުތުކޮޅެއް ތެރޭ ހުއްޓުމަކަށް އަންނާނެ ކަމަށް ޣައްޒާގެ ސިއްހީ ވުޒާރާއިން ވަނީބުނެފައެވެ.