ސައުދީ ޕްރޮފެޝަނަލް ލީގުގައި ހުކުރު ދުވަހުގެ ރޭ ރަށުން ބޭރުގައި އަލް ނަސްރާއި ދެކޮޅަށް އަލް ހިލާލުން ކުޅުނު މެޗުގެ އިތުރު ވަގުތުގެ ތެރޭގައި އެޓީމުން ކާމިޔާބުކުރި ލަނޑާއެކު 1-1 ގެ ނަތީޖާއަކުން ދެޓީމު އެއްވަރުވެއްޖެއެވެ.

މިދެޓީމު އެންމެ ފަހުން ކުޅުނު ތިން މެޗުން ވެސް އަލް ހިލާލް މޮޅުވެފައިވާއިރު، އަލް ނަސްރު އަތުން އަލް ހިލާލް އެންމެ ފަހުން ބަލިވެފައި ވަނީ 2023 ވަނަ އަހަރުގެ އޮގަސްޓު މަހު އަރަބި ޗެންޕިއަންސް ކަޕް ފައިނަލުގައި 2-1 ގެ ނަތީޖާއަކުންނެވެ.

މިމެޗުގެ ފުރަތަމަ ހާފު ފެށިގެން 30 ސިކުންތުވެސް ނުވަނީސް އަލް ނަސްރުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ޕޯޗުގަލް މިޑްފީލްޑަރު އޮޓާވިއޯ އެވެ. މިއީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ތަނަވަސްކޮށްދިން ފުރުސަތެއްގައި އަލް ހިލާލްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެވެ.

އަލް ނަސްރުގެ ލަނޑަށްފަހު ފުރަތަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި އަލް ނަސްރުގެ ކެޕްޓަން ރޮނާލްޑޯއަށް ވަރަށް ހުސް ދެފުރުސަތު ލިބި ވަނީ ބޭނުން ނުކުރެވިފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

މެޗުގެ ދެވަނަ ހަފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔައިރު، މެޗުގެ ފަހުކޮޅު އަލް ނަސްރުން ގާތްގާތުގައި ފޮނުވާލި ދެހަމަލާއެއް ގޯލު ދަނޑިއަށް އަމާޒުވިއިރު، މިހާފުގައިވެސް އެޓީމުގެ ލީޑު ފުޅާކުރުމަށް ރޮނާލްޑޯއަށް ވަނީ ވަރަށް ހުސް ތުރުސަތެއްލިބި ބޭނުން ނުކުރެވިފައެވެ.

މީގެ އިތުރުން މިހާފުގައި އަލް ހިލާލުގެ ސާބިއާ ފޯވާޑް އެލެގްޒެންޑަރ މިޓްރިވިޗު އަށް ވެސް ވަނީ ނަތީޖާއެއްވަރު ކުރުމަށް ވަރަށް ހުސް ދެފުރުސަތެއް ލިބި ބޭނުން ކުރެވޭ ގޮތްނުވެފައެވެ.

އަލް ހިލާލުން މެޗުގެ ނަތީޖާ އެއްވަރުކުރި ލަނޑު މެޗުގެ އިތުރު ވަގުތުގެ ގޮތުގައި ދެއްކި އަށް މިނެޓުގެ ތެރެއިން ހަވަނަ މިނެޓުގައި އެޓީމަށް ލިބުނު ޕެނަލްޓީއެއްގައި ކާމިޔާބުކޮށްދިނީ މިޓްރޮވިޗު އެވެ. މިއީ މިސީޒަނުގައި ލީގުގައި ކުޅުނު 26 މެޗުގައި އޭނާ ކާމިޔާބުކުރި 27 ވަނަ ލަނޑެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ލީގުގައި ކުޅުނު 32 މެޗުން އަލް ހިލާލަށް 90 ޕޮއިންޓް ލިބިފައިވާއިރު، މިމެޗުން ލިބުނު އެއް ޕޮއިންޓާއެކު ލީގުގައި ކުޅުނު 32 މެޗުން އަލް ނަސްރަށް ލިބިފައިވަނީ 78 ޕޮއިންޓެވެ.