ހައްދުފަހަނައަޅާފައިވާ އިސްރާއީލުން ފަލަސްތީނުގެ ޣައްޒާ އަށް ދެމުންގެންދާ ހަމަލާތަކާއި ގުޅިގެން ފުޓުބޯޅައިގެ އެންމެހާ ޙަރަކާތްތަކުން އިޒްރޭލް ސަސްޕެންޑު ކުރުމާ މެދު، ޤާނޫނީ ލަފާ ހޯދުމަށް ފީފާއިން ނިންމައިފިއެވެ.

އިޒްރޭލް ސަސްޕެންޑު ކުރުމަށް އެދި ފަލަސްތީނުން ފީފާއަށް ހުށައަޅާފައިވާއިރު، ފީފާގެ ރައީސް ޖިއާނީ އިންފަންޓީނޯ މިފަދައިން ނިންމީ ބެންކޮކްގައި ބޭއްވި ކޮންގްރެސްއެއްގައެވެ.

ފަލަސްތީނުން ހުށައެޅި ޕްރޮޕޯސަލް ގައި އަނިޔާވެރި އިސްރާއީލު ސަރުކާރުން ބައިނަލްއަގުވާމީ ގާނޫނުތަކާ ހިލާފުވުމުގައި އިސްރާއީލު ފުޓްބޯޅަ އެސޯސިއޭޝަން (އައިއެފްއޭ) ގެ ބައިވެރިވުން އޮތް ކަމަށާއި އަރަބި ކުޅުންތެރިންނާ މެދު ތަފާތުކުރުން ގެންގުޅޭ ކަމަށް ވަނީ ބުނެފައެވެ.

Advertisement

ފަލަސްތީނުގެ ފުޓްބޯޅަ އެސޯސިއޭޝަން (ޕީއެފްއޭ) ގެ ރައީސް ޖިބްރީލް ރަޖޫބު ވިދާޅުވީ، ފަލަސްތީނުގައި ހިނގަމުންދާ ނަސްލު ނައްތާލުމާ މެދު ފީފާ އިން ފަރުވާ ކުޑަ ކުރެވިގެން ނުވާނެ ކަމަށެވެ. އަދި ފަލަސްތީނުގެ ރައްޔިތުން ތަހަންމަލު ކުރަމުންދާ އަނިޔާގައި، އެ ޤައުމުގެ ފުޓުބޯޅަ ކުޅުންތެރިން ވެސް ހިމެނޭ ކަމަށާއި އެ މަންޒަރު ދުނިޔެ އަށް ފެންނަމުންދާއިރު، ފީފާ އަށް ވެސް އެ މަންޒަރު ފެންނަން ޖެހޭނެ ކަމަށް އޭނާ ވިދާޅުވިއެވެ.

މިކަމާއި ގުޅިގެން ފީފާގެ ރައީސް ޖިއާނީ އިންފަންޓީނޯ ވިދާޅުވީ، ކަމުގެ ޤާނޫނީ ލަފާ ހޯދުމަށްފަހު އެ މައްސަލައާއި ގުޅޭގޮތުން ފީފާއިން ގޮތެއް ނިންމާނެ ކަމަށެވެ.

އައިއެފްއޭ އާއި ދެކޮޅަށް މި ފިޔަވަޅުތައް އެޅުމަށް ހުށައެޅިއިރު، މީގެ ދެ އަހަރު ކުރިން ފީފާ އިން ވަނީ ރަޝިއާ އާއި ޔޫކްރެއިން ގެ ހަނގުރާމަ އާއި ގުޅިގެން ބައިނަލްއަގްވާމީ މުބާރާތްތަކުން ރަޝިއާ ސަސްޕެންޑް ކުރުމަށް ނިންމާފައެވެ.