ޓެކްސީ ޑްރައިވަރަކު ދަތުރެއް ނެގުމަށްފަހު ރުޅި އައިސްގެން ދަތުރުވެރިން އެމީހުން އެރިތަނަށް ބާލާފައި ދިޔަ މައްސަލައެއް ފުލުހުން ތަހުގީގު ކުރަން ފަށައިފިއެވެ.

އެ ކާރުން ދަތުރުނެގި ފަރާތް އެ ވާހަކަ ސޯޝަލް މީޑިއާގައި ހިއްސާ ކޮށްފައިވާއިރު، އެ ފަރާތުން ބުނި ގޮތުގައި ހުޅުމާލޭގައި އޮތް އޭނާގެ ދަރިފުޅުގެ ފެތުމުގެ މުބާރާތެއް ނިންމުމަށްފަހު، މާލެ އައުމަށް ޓެކްސީ ދަތުރެއް ނަގައި، ޓެކްސީއަށް އެރުވުމަށްފަހު ޑްރައިވަރު ބޭކާރު އެތައް ވާހަކައެއް ދެއްކިއެވެ.

ވާހަކަ ދައްކަމުން ގޮސް، އަޚުލާގީ މިންގަނޑަށް ނުފެތޭ ވާހަކަތައް ވެސް ދައްކައި، ޓެކްސީއަށް އިތުރު މީހަކު އެރުވިޔަސް ހެޔޮތޯ އެހި ކަމަށް ކާރުން ދަތުރުނެގި ފަރާތް ބުނެފައިވެއެވެ. އެއާއިއެކު، ޖަވާބުގައި، އެހެން މީހަކު އެރުވިޔަސް މައްސަލަ އެއް ނެތް ކަމަށް ބުނި ކަމަށެވެ.

އެއާއިއެކު، އެކަމާ އެއްބަސްނުވެ، އެއީ ޑްރައިވަރާއި ދަތުރުވެރިޔާ އާއި ދެމެދު އޮތް ކަމެއް ކަމަށް ބުނެ ޑްރައިވަރު ދެކޮޅު ހަދާ ރުޅިގަދަ ކުރަން ފެށިކަމަށް އެމީހާ ބުންޏެވެ.

އެއާއިއެކު، ކާރުގައި ތިބި ދަތުރުވެރިންނާއި އެކު މުޅި ހުޅުމާލެ ވަށާ ބުރު ޖެހިއިރު ވެސް ކާރަށް އަރާނެ އިތުރު ފަރާތެއް ނުވުމުން  އެ މީހުން އަނބުރާ އެ ކާރަށް އެރި ތަނަށް ބާލާފައި ދިޔަ ކަމަށް އެ މީހާ ވަނީ ބުނެފައެވެ.

މި މައްސަލަ އާއި ގުޅިގެން މޯލްޑިވްސް ޕޮލިސް ސާވިސްގެ ސްޕޯކްސްޕާސަން ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ، ހުޅުމާލެ ޕޮލިސް ސްޓޭޝަނުން މި މައްސަލަ ތަހުގީގުކުރަމުން އަންނަ ކަމަށާއި، އެކަމާ ގުޅިގެން އަމަލުކުރަންޖެހޭ ގަވާއިދުތަކާ އެއްގޮތްވާ ގޮތުގެ މަތިން އަޅަންވާ ފިޔަވަޅުތައް ފުލުހުންގެ އިދާރާއިން އަޅާނެ ކަމަށެވެ.

ބައެއް ޓެކްސީ ޑްރައިވަރުންގެ ފަރާތުން މިފަދަ އަމަލުތައް ފެންނާތީ، ރާއްޖެ އަންނަ ފަތުރުވެރިންނަށާއި ދިވެހިންނަށް އެއާޕޯޓް ޓެކްސީ ކިއު އިން ކުރިމަތިވާ މައްސަލަތަކާ ގުޅިގެން އާންމު ރައްޔިތުންގެ ފަރާތުން އަންނަ ޝަކުވާތައް އިތުރުވުމާއި ގުޅިގެން ދާދި ފަހުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވެސް ވަނީ ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ގަވާއިދާ ހިލާފަށް ހަރަކާތްތެރިވާ ޓެކްސީތަކާއިމެދު ފިޔަވަޅު އެޅުމަށް ނިންމާފައެވެ.