ސިފައިން ސެކިއުރިޓީ ބަލަހައްޓާ ސަރަހައްދުތަކާއި އެއަރޕޯޓްތައް ހިމެނޭ ސަރަހައްދުތަކަށް ހުއްދަނެތި ޑްރޯން އަރުވާނަމަ ފިޔަވަޅު އެޅުމަށް ދިފާއީ ވުޒާރާއިން ނިންމައިފިއެވެ.

ދިފާއީ ވުޒާރާއިން މިއަދު ކުރި އިއުލާނެއްގައި ބުނީ، މިހާރަކަށް އައިސް ސިފައިން ސެކިއުރިޓީ ބަލަހައްޓާ ސަރަހައްދުތަކާއި އެއަރޕޯޓްތައް ހިމެނޭ ސަރަހައްދުތަކުގައި އަންމޭންޑް އޭރިއަލް ވެހިކަލް (ޔޫ.އޭ.ވީ) ނުވަތަ ޑްރޯން އުދުއްސާކަން ފާހަގަކުރެވިފައިވާ ކަމަށެވެ.

މިއީ ވައިގެ ދަތުރުފަތުރަށް އެކަމުގެ ސަބަބުން ނުރައްކަލެއް މެދުވެރިވެދާނެ ކަމަކަށްވާތީ، ޑްރޯން އުދުއްސުމުގެކުރިން ހުއްދަ ހޯދުމަށް މީގެކުރިންވެސް އާންމުކޮށް އަންގާފައިވާނެކަން ފާހަގަކުރަމުން އެ ވުޒާރާއިން ބުނީ ރާއްޖޭގެ ކޮންމެ ދިމާއެއްގައި ޑްރޯން އަރުވަން ބޭނުންވި ކަމުގައިވިއަސް ވުޒާރާގެ ހުއްދަ ހޯދަން ޖެހޭނެ ކަމަށެވެ.

Advertisement

ހުއްދަ ހޯދުމަށް އެދި ފޯމު ހުށަހަޅާއިރު، ރަސްމީ ބަންދުނޫން 3 ދުވަސްކުރިން ހުށަހެޅުމަށް އެވުޒާރާއިން ވަނީ އެދިފައެވެ.

ހަމައެއާއިއެކު، ހުއްދަ ނުހޯދާ މިކަންކުރާ ފަރާތްތަކާއިމެދު ފިޔަވަޅު އެޅޭނެކަމަށާއި، ހުއްދަ ނުހޯދާ އުދުއްސާ ޑްރޯންތަކާމެދު އަޅާ ފިޔަވަޅަކާއި ގުޅިގެން އެތަކެއްޗަށް ލިބޭ ގެއްލުމެއްގެ ޒިންމާ ދިފާއީ ވުޒާރާއިން ނުނަގާނެ ކަމަށް ވެސް ވަނީ ބުނެފައެވެ.