ދިވެހިރާއްޖޭގައި އެކި މަޝްރޫއުތައް ހިންގުމަށް ސަރުކާރުން ނަގާފައިވާ ލޯންތަކުގެ ތެރެއިން އެންމެ ގިނަ އަދަދެއްގެ ފައިސާ ނުލިބި ހުރީ އިންޑިއާގެ އެކްސްޕޯޓް އިމްޕޯޓް ބޭންކް އޮފް އިންޑިއާ (އެގްޒިމް ބޭންކް) އިން ނަގާފައި ހުރި ފައިސާ ކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސްއިން އާއްމުކޮށްފައިވާ މި އަހަރުގެ ފުރަތަމަ ކުއާޓަރލީ ޑެޓް ބުލެޓިންގައި ބުނެފައިވާގޮތުން ދިވެހި ރާއްޖެއިން ލޯނުގެ ގޮތުގައި ނަގާފައިވާ ފައިސާގެ ގޮތުގައި ލިބެން ޖެހޭ ބޮޑު އަދަދެއް ހުރީ ނުލިބިއެވެ.

އެގޮތުން، ރާއްޖެއިން ނަގާފައިވާ ލޯނު ތަކުގެ ތެރެއިން މިހާތަނަށް 24 ބިލިއަން ރުފިޔާ ނުލިބި ހުރި އިރު އޭގެ 65 ޕަސެންޓު ލިބެން ޖެހެނީ އިންޑިއާގެއެގްޒިމް ބޭންކުން ކަމަށް ރިޕޯޓުން އެނގެއެވެ. 

އެގޮތުން، އިންޑިއާގެ އެގްޒިމް ބެންކްއިން ނުލިބި ހުރި ފައިސާގެ ގޮތުގައި 15.71 ބިލިއަން ރުފިޔާ މި އަހަރުގެ އެއްވަނަ ކުއާޓާ ނިމުނުއިރު ހުރިކަމަށް ރިޕޯޓްގައިވެއެވެ. 

މިިދިޔަ ފަސް އަހަރު އިންޑިއާގެ އެގްޒިމް ބޭންކުން ނެގި ލޯނުގެ އަދަދު 1.4 ބިލިއަން ޑޮލަރު (22 ބިލިއަން ރުފިޔާ) އަށް އަރަ އެވެ. އޭގެ ތެރެއިން އެންމެ ބޮޑު އަދަދެއް ނަގާފައިވަނީ ވިލިމާލެ އާއި ގުޅިފަޅާ ދެމެދު ބްރިޖަކުން ގުޅައިލުމުގެ މަޝްރޫއު ކުރިއަށް ގެންދިއުމަށެވެ. އެ މަޝްރޫއަށް 400 މިލިއަން ޑޮލަރު (6.1 ބިލިއަން ރުފިޔާ) ގެ ލޯނެއް ނެގި އެވެ.

އިންޑިޔާގެ އިތުރުން ސައުދީ ޑިވެލޮޕްމެންޓު ފަންޑުންވެސް ދޫނުކޮށް 1.6 ބިލިއަން ހުރިކަމަށް ފިނޭންސްގެ ރިޕޯޓް ތަކުން ދައްކާއިރު، އިންޓަރނޭޝަނަލް ޑިވެލޮޕްމެންޓު އެސޯސިއޭޝަނުން ނެގި ލޯނުގެ 1.2 ބިލިއަން އަދި ނުލިބޭ ކަމަށް އާއްމުކުރި ރިޕޯޓުން އެނގެއެވެ. އަދި އޭޝިއަން ޑިވެލޮޕްމެންޓު ބެންކުގެ ފަރާތުން 908.5 މިލިއަން ރުފިޔާ ނުލިބިހުރިކަން އާއްމުކޮށްފައިވެއެވެ.

މީގެ އިތުރުން، ގްރޭޓާރ މާލެ ވޭސްޓް ޓު އެނާރޖީ ޕްރޮޖެކްޓު ފަދަ މަޝްރޫއުތަކަށް ފަންޑުކޮށްފައިވާ އޭޝިއަން އިންފްރާސްޓްރަކްޗާ ބެންކުގެ ފަރާތުންވެސް ލިބެން ޖެހޭ 853.9 މިލިއަން ހުރިކަމަށާއި ރާއްޖޭގެ ރަށްތައް ހިމާޔަތްކުރުމުގެ މަސައްކަތްތަކާއި އެކި ސަރަހައްދުތަކުގައި ހޮސްޕިޓަލްތައް ގާއިމުކުރުމަށް ކުވައިތު ފަންޑު ފޯ އަރަބް އިކޮނޮމިކް ޑިވެލޮޕްމެންޓުން ދޭން ބުނެފައިވާ ލޯނުގެ 723.2 މިލިއަން ރުފިޔާވެސް ނުލިބޭކަމަށް ހާމަކޮށްފައިވެއެވެ.

ހަމަ އެހެންމެ، އޭބީއެން އެމްރޯގެ ފަރާތުންވެސް 721.6 މިލިއަން ނުލިބި ހުރިއިރު، އަބޫދާބީ ފަންޑުގެ ފަރާތުން 683.2 އަދި އެހެނިހެން ފަރާތްތަކުން ލިބެން ޖެހޭ 1.82 ބިލިއަންވެސް ނުލިބިހުރިކަމަށް ތަފާސްހިސާބުތަކުން އެނގެއެވެ.

ފުރަތަމަ ތިން މަހުގެ ތަފާސްހިސާބުތަކުން ދައްކާ ގޮތުން ދައުލަތުގެ ޖުމްލަ ދަރަނި ވަނީ 126 ބިލިއަން ރުފިޔާއަށް އަރައިފަ އެވެ.