ނިމިދިޔަ 19 ވަނަ ރައްޔިތުންގެ މަޖިލީހުން، ބޭރު ފައިސާ ހޯދުމަށް މި ސަރުކާރަށް ދަތިތައް ކުރިމަތި ކުރުވަމުން ދިޔަ ކަމަށް އިކޮނަމިކް މިނިސްޓަރ މުހައްމަދު ސަޢީދު ވިދާޅުވެއްޖެއެވެ.

ޕީއެސްއެމްގެ “ރާއްޖެ މިއަދު” ޕްރޮގްރާމްގައި ވާހަކަދައްކަވަމުން ސަޢީދު ވިދާޅުވީ، 2024 ވަނަ އަހަރުގެ ބަޖެޓް 50 ބިލިއަނަށްވުރެ މަތި ނުކުރެއްވުމަށް އޭރުގެ އިންތިޚާބީ ރައީސް އަދި އަދުގެ ރައީސް ޑރ މުހައްމަދު މުޢިއްޒު އެދިލެއްވި ކަމަށެވެ. އަދި އެކަމަށް އޭރުގެ އެމްޑީޕީ މެޖޯރިޓީ އޮތް މަޖިލީހުގެ މާލިއްޔަތު ކޮމިޓީންވެސް އެއްބަސްވި ކަމަށް ސައީދު ވިދާޅުވިއެވެ. 

އަދި މަޖިލީހުން ފިއްތުންތައް ކުރިމަތި ކުރުވައި ކެބިނެޓަށް ރުހުން ނުދީ، ބޭރުގެ ފައިސާ ހޯދުމަށް ދަތިތައް ކުރިމަތި ކުރުވަމުންދިޔައިރުވެސް ރައީސް މުޢިއްޒު އިސްކުރެއްވީ ކެތްތެރިކަމާއި ހިކުމަތްތެރިކަން ކަމަށް ސަޢީދު ވިދާޅުވިއެވެ.

ކަންމިހެން ހުރި ނަމަވެސް، ރައީސް މުޢިއްޒުގެ ވެރިކަމުގެ 6 މަސް ދުވަސް ނިންމަވާލައްވައި ކުރިއަށް ވަޑައިގަންނަވަނީ، އެއްވެސް ފައިސާއެއް ޗާޕު ނުކުރައްވާ ކަމަށް ސަޢީދު ވިދާޅުވިއެވެ. 

އޭގެ ނަތީޖާއެއްގެ ގޮތުން، ފައިސާގެ އަގު އުފުލި، ކާބޯތަކެތީގެ އަގު ކަންބޮޑުވާ ވަރަށް އުފުލިގެން ނުގޮސް ހަމަސް ދުވަސް ނިންމާލެވިފައިވާ ކަމަށްވެސް ސަޢީދު ވިދާޅުވިއެވެ. އަދި ދިވެހިން ބަނޑަށް ނުޖެހި، އެމްޑީޕީން ރޭވި ފަދައިން ރާއްޖެ ބަނގުރޫޓްވެގެން ވެސް ނުދާ ކަމަށް ސަޢީދު ވިދާޅުވިއެވެ.