ރާއްޖޭގެ އިސްލާމިކް ޔުނިވާސިޓީ (އައިޔޫއެމް)ގައި މަސައްކަތް ކުރައްވާ ފަލަސްތީނުގެ ޕްރޮފެސަރ ޑރ. ހަސަން ކުރްދީގެ އާއިލާ، އިންޓަނޭޝަނަލް އެއިޑް ކެމްޕެއިން (އައިއޭސީ) ގެ އެހީގައި ރާއްޖެ ގެނެސްފިއެވެ.

ޑރ.ކުރްދީގެ އާއިލާ ޣައްޒާގައި ދިރިއުޅެމުން އައި ގެޔަށް ޔަހޫދީން ބޮން އަޅައި ސުންނާފަތި ކޮށްލުމުގެ ސަބަބުން، އެއާއިލާ ދިރިއުޅެމުން އައީ ރަފަހްގައި ހުރި ކޭމްޕެއްގައެވެ.

ނަމަވެސް އެތަންވެސް ރައްކާތެރި ތަނަކަށް ނުވުމުން، އެމީހުން ރާއްޖެ ގެނައުމުގެ މަސައްކަތް ކުރަމުން އަންނަ ކަމަށް ޑރ. ކުރްދީ ވިދާޅުވީ ނިމިދިޔަ ރޯދަމަހުގެ ތެރޭގައެވެ.

ކުރުދީގެ ޢާއިލާ ރާއްޖެ އައުން: ފޮޓޯ/ ވޮއިސް

ކުރުދީގެ ދަރިފުޅު ގޯފަންޑުގައި ބުނެފައިވާ ގޮތުން، މިސްރުގެ ޓްރެވަލް އެޖެންސީއެއް މެދުވެރިކޮށް، ރަފަހްއިން މިސްރަށް މީހުން އެތެރެކުރަނީ 10،000 ޑޮލަރު މީހަކަށް ދައްކައިގެން ކަމަށާއި، އެ އާއިލާގައި ހިމެނޭ އޭނާގެ މަންމަ އާއި ކޮއްކޮމެންނާ އެކު މިސްރަށް އެތެރެވުމަށް 54،000 ޑޮލަރު ބޭނުންވާއިރު އެމީހުނަށް އެއްކުރެވިފައިވަނީ 517 ޑޮލަރެވެ.

ކުރުދީގެ ޢާއިލާ ރާއްޖޭގައި: ފޮޓޯ/ ވޮއިސް

އެއާއިލާގެ ޚަބަރު އައިއޭސީއަށް ލިބުމާއެކު، އެ ޖަމިއްޔާއިން ވަނީ ކުރުދީއާއި ބައްދަލުކޮށް އޭނާގެ އާއިލާ ޣައްޒާއިން ނެރެ، ތުރުކިޔޭއިން ރާއްޖެ އައުމަށް ދާނެ ހުރިހާ ޚަރަދެއްވެސް ހަމަޖައްސާނެ ކަމަށް ބުނެފައެވެ. 

އެގޮތުން އެ ފައިސާ ކުރުދީއާއި ހަވާލުކޮށްފައިވާއިރު، އޭނާގެ އާއިލާ ޣައްޒާއިން ތުރުކިޔޭއަށް ގެންގޮސް، މިއަދުގެ ވަގުތެއްގައި މިހާރު ވަނީ އެ އާއިލާ ރާއްޖެވެސް އައިސްފައެވެ.  

ޑރ.ކުރްދީގެ އާއިލާގެ އިތުރުން، ޖެނުއަރީ މަހުގެ ތެރޭގައި އައިއޭސީގެ ހަރަދުގައި ދިވެއްސަކަށް ނިސްބަތްވާ އާއިލާއެއްގެ ހަތް މެމްބަރުންވެސް ވަނީ މިސްރަށް ގެންގޮސްދީފައެވެ.

އައިއޭސީން ވަނީ ޣައްޒާއަށް އެހީވުމުގައި ދިވެހިން ދެމުންދާ އެއްބާރުލުމަށް ޝުކުރު އަދާކޮށްފައެވެ.