ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒްގެ ސިއްހީ ހާލަތު ދަށްވުމުން ރައީސް ޑރ. މުހައްމަދު މުއިއްޒު ކަންބޮޑުވުންފާޅުކުރައްވައިފިއެވެ.
ރައީސް މުއިއްޒު މިއަދު އެކްސްގައި ކުރެއްވި ޕޯސްޓެއްގައި ވަނީ، މާތް ވެގެންވާ ދެ ހަރަމްގެ ޚާދިމް، ސަލްމާން ރަސްގެފާނުގެ ސިއްހީ ހާލުކޮޅާ މެދު ކަންބޮޑުވެވަޑައިގަންނަވާ ކަމަށެވެ. އަދި، އެމަނިކުފާނާއި ދިވެހިންވެސް އެދެނީ ރަސްގެފާނަށް އަވަސް ޝިފާއެއް ދެއްވުން ކަން ފާހަގަކުރައްވައި ރައީސް މުޢިއްޒު ވަނީ ސަލްމާން ރަސްގެފާނު ފުރިހަމަ ސިއްހަތެއް ދެއްވާތޯ ދުޢާދަންނަވާފައެވެ.
88 އަހަރުފުޅުގެ ރަސްގެފާނު ސަލްމާން ގެންދަވަނީ ފުއްޕާމޭ ދުޅަވުމުގެ ސަބަބުން ފަރުވާ ހޯއްދަވަމުންނެވެ.
އެގޮތުން މި ހަފްތާގެ އާދިއްތަ ދުވަހު އެސްޕީއޭ އިން ރިޕޯޓް ކުރި ގޮތުގައި ރަސްގެފާނު ސަލްމާން ވަނީ ހުން އައިސް ހުޅުތަކުގައި ރިއްސާތީ އެމަނިކުފާނުގެ މެޑިކަލް ޓީމުގެ އެދުމުގެ މަތިން ޓެސްޓްތަކެއް ހަދާފައެވެ.
އަދި އޭގެފަހުން އެނޫހުން ރިޕޯޓް ކުރި ގޮތުގައި ރަސްގެފާނު ސަލްމާން ދަނީ އެމަނިކުފާނުގެ ފުއްޕާމޭ ދުޅަވުމާއި ގުޅިގެން އެންޓިބަޔޮޓިކްސް ހިމެނޭ ތެރަޕީ ޕްރޮގްރާމެއް ނަންގަވަމުންނެވެ.
މިކަމާއި ގުޅިގެން ގިނަ ގައުމުތަކުގެ ވެރިން ދަނީ ރަސްގެފާނަށް ހިތްވަރުގެ މެސެޖުތައް ފޮނުއްވަމުންނެވެ.
Advertisement
This content is created and paid for by advertisers and does not involve Voice Journalists
