ސްޕެއިންގެ ބާސެލޯނާ އިން އެޓީމުގެ ކޯޗު ޒަވީ ހަނާންޑޭޒް މަގާމުން ވަކިކުރުމަށްފަހު، ފަހުގެ ތާރީޚެއްގައި އެޓީމަށް ކުރިމަތިވި އެންމެ ލަދުވެތި ނަތީޖާ (8-2) ނަތީޖާއަކުން ބަޔާން މިއުނިކް އަތުން ބަލިވިއިރު، އެޓީމުގެ ކޯޗަކަށްހުރި ޖަރުމަނު ހަންސީ ފްލިކް ބާސާގެ ކޯޗުކަމުގެ މަގާމަށް ހަމަޖެއްސުމަށް ނިންމައިފިއެވެ.

ލީގުގައި ބާކީ އެއްމެޗު އޮއްވައި ޒަވީ މަގާމުން ވަކިކުރަން ނިންމިކަން ކުލަބުން އިއުލާންކުރި ނަމަވެސް ލީގުގެ ފަހު މެޗުގައި އާދިއްތަދުވަހު ރެއާލް ބެޓިސް އާއި ދެކޮޅަށް ކުޅޭ މެޗުގައި ބާސެލޯނާއަށް އިރުޝާދު ދޭނީ ޒަވީ އެވެ. އަދި އެމެޗަކީ ބާސެލޯނާގެ ބެންޗުން ޒަވީ ފެނިގެންދާނެ ފަހު މެޗުކަން މިހާރު ވަނީ ޔަގީންވެފައެވެ.

މީގެ އިތުރުން ޒަވީގެ ބަދަލުގައި ކުރިއަށް އޮތް ސީޒަނުގައި އެކުލަބުގެ ބެންޗުން ފެނިގެންދާނީ ބަޔާން މިއުނިކާއި ޖަރުމަނުގެ ކުރީގެ ކޯޗު ހަންސީ ފްލިކް އެވެ. މީޑިއާ ރިޕޯޓްތައް ބުނާގޮތުގައި ފްލިކް އާއި އެކު ބާސެލޯނާ އިން ވަނީ ދެއަހަރުގެ އެއްބަވުމެއް ހަދާފައެވެ.

އުމުރުން 59 އަހަރުގެ ފްލިކް ވަނީ 2019 އަހަރުން ފެށިގެން 2021 ވަނަ އަހަރާއި ހަމައަށް ބަޔާން މިއުނިކާއެކު ދެފަހަރު ބުންޑަސްލީގާ ޗެންޕިއަންކަން ހޯދުމުގެ އިތުރުން ޖަރުމަނު ކަޕާއި، ޖަރުމަނު ސުޕަކަޕް، ޔުއެފާ ޗެންޕިއަންސް ލީގު، ޔުއެފާ ސުޕަކަޕްގެ އިތުރުން ކުލަބު ވޯލްޑްކަޕް ކާމިޔާބުކޮށްފައެވެ. އަދި 2021 ވަނަ އަހަރުން ފެށިގެން 2023 ވަނަ އަހަރާއި ހަމައަށް ޖަރުމަނުގެ ގައުމީ ޓީމަށް އިރުޝާދުދީފައެވެ.

މީގެ އިތުރުން ފާއިތުވެދިޔަ ދެއަހަރުތެރޭގައި ޒަވީގެ އިރުޝާދުގެ ދަށުން ބާސެލޯނާ 141 މެޗު ކުޅެފައިވާއިރު، އޭގެތެރެއިން 89 މެޗުން އެޓީމު މޮޅުވެ، 29 މެޗުން ބަލިވެފައިވާއިރު 23 މެޗު ނިމިފައި ވަނީ އެއްވަރުވެގެންނެވެ. އަދި ޒަވީ އާއެކު ބާސެލޯނާ އިން ވަނީ ލަލީގާގެ އިތުރުން ސްޕެނިޝް ސުޕަކަޕް ޗެންޕިއަންކަން ހޯދާފައެވެ.