ދިވެހި ހައްޖާޖީން މިނާގައި ތިބޭއިރު ދޭ ކެއުމުގައި ދިވެހި ރަހަތައް ހިމެނުމަށް ޙައްޖު ކޯޕަރޭޝަނުން ނިންމައިފިއެވެ.

ހައްޖު ކޯޕަރޭޝަންގެ އެމްޑީ މުހައްމަދު ޝަކީލް އެކްސްގައި ކުރެއްވި ޕޯސްޓެއްގައި ވިދާޅުވީ، ޙައްޖުގެ އަޅުކަމުގައި އުޅޭއިރު މިނާ ޓެންޓްގައި ހޭދަކުރާ ދުވަސްތަކަކީ ދިވެހި ޙާޖީން ކެއުމުގައި ބޮޑު ތަކުލީފުތަކެއް އުފުލަމުންދާ ދުވަސްތަކެއް ކަމަށެވެ.

މިނާ ފޭލިގޭގައި ކެއުން ފޯރުކޮށްދެނީ ޙައްޖުގެ މުތައްވިފް ކަމުން އެބޭފުޅުން ފޯރުކޮށްދޭ ކެއުމަކީ ދިވެހިންނާ އެންމެ ގުޅޭގޮތަށް ފޯރުކޮށްދެވޭ ކެއުމެއް ނޫނެވެ. އޭގެ ސަބަބުން ހައްޖާޖީންނަށް ބޮޑެތި ތަކުލީފް ތަކަކާއި ކުރިމަތިލާން ޖެހެއެވެ. 

މި އަހަރުގެ ޙައްޖުގައި މޯލްޑިވްސް ޙައްޖު ކޯޕަރޭޝަނުން 1000 ބޭފުޅުން ޙައްޖަށް ގެންދާ ގޮތަށް ހަމަޖެހިފައުވާއިރު ކޯޓާ އިތުރުވާނެ ކަމަށް ބަލައި އެކަމަށްވެސް ހައްޖު ކޯޕަރޭޝަނުން އަންނަނީ ތައްޔާރުވަމުންނެވެ.  

މީގެ އިތުރުން، ޙައްޖުވެރިންގެ އެންމެހާ އިންތިޡާމްތައް ހަމަޖެއްސުމަށްޓަކައި ޙައްޖު އެހީތެރިންގެ އެޑްވާންސް ޓީމްވެސް މިހާރު ތިބީ މައްކާގައެވެ. އެ ޓީމުން ދަނީ މައްކާ ހޮޓަލާއި މިނާ ފޭލިގެތައް ތައްޔާރުކުރުމަށް ގިނަގުނަ މަސައްކަތްތަކެއް ކުރައްވަމުންނެވެ.