6 ކައުންސިލެއްގެ ބައި-އިލެކްޝަންގައި އެމްޑީޕީގެ ޓިކެޓުގައި ވާދަކުރަން ބޭނުންވާ ފަރާތްތަކުން އެކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.

އެމްޑީޕީން އިއްޔެ ކުރި އިއުލާނެއްގައި ބުނީ 20 ވަނަ ރައްޔިތުންގެ މަޖިލީހަށް މެންބަރުން އިންތިޚާބުވުމާއި ގުޅިގެން ހުސްވެފައިވާ މަޤާމްތަކަށް އިންތިޚާބުކުރުމަށް ބާއްވާ ބައި-އިލެކްޝަންގެ، އެ ޕާޓީގެ ޕްރައިމަރީގައި ވާދަކުރަން ބޭނުންވާ މެންބަރުން ޝައުޤުވެރިކަން ފާޅުކުރުމަށް ހުޅުވާލާފައިވާ ކަމަށެވެެ.

– ހުޅުމާލެ ދާއިރާގެ ކައުންސިލް މެމްބަރު

– ހެންވޭރު ހުޅަނގު ދާއިރާގެ ކައުންސިލް މެމްބަރު

– މައްޗަންގޯޅި މެދު ދާއިރާގެ ކައުންސިލް މެންބަރު

– ކުޅުދުއްފުށި އުތުރު ކައުންސިލް މެންބަރު

– ޅ. އަތޮޅު ކައުންސިލް ރައީސް

– ރ. ހުޅުދުއްފާރު ކައުންސިލް މެންބަރު

އެހެންކަމުން، އެ މަގާމުތަކަށް އެ ޕާޓީގެ ޓިކެޓްގައި ކުރިމަތިލުމަށް ޝައުޤުވެރިވާ ފަރާތްތަކުން، އެކަމަށް ހާއްސަ ކުރެވިފައިވާ ގޫގްލް ފޯމް މެދުވެރިކޮށް ޝައުޤުވެރިކަން ފާޅުކުރުމަށް އެދިފައިވެއެވެ.

އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ކުށާއި ދަރަނީގެ ރިކޯޑު ސާފުކުރާ ފޯމް އެއިދާރާއިން ސާފުކުރުމަށްފަހު ފުރިހަމަކޮށް، ޝައުޤުވެރިކަންފާޅުކުރާ ފޯމާއި އެކު 03 ޖޫން 2024 ގެ 14:00 ކުރިން ހުށައެޅުއްވުމަށް އެ ޕާޓީން ވަނީ އެދިފަ އެވެ.