12 އަހަރުގެ މެދުކެނޑުމަކަށް ފަހު، ސީދާ ސީރިއާއިން ސައުދީ އަރަބިއާއަށް ހައްޖުގެ މަތިވެރި އަޅުކަން އަދާކުރުމަށް އެގައުމުގެ މީހުން ދިޔުމަށްޓަކައި ދަތުރުތައް ފަށައިފިއެވެ.
މި ހަފްތާގެ އަންގާރަ ދުވަހު ފުރަތަމަ ފްލައިޓް ހައްޖުވެރިންނާއި އެކު ސީރިއާއިން ފުރާފައިވާއިރު، ސީރިއާގެ ޓްރާންސްޕޯޓް މިނިސްޓްރީގެ އޮފިޝަލް ސުލައިމާން ޚަލީލް ވިދާޅުވީ، މި ދަތުރުތައް މިފަދައިން ކުރިއަށް ގެންދިޔުމަށް ނިންމާފައިވަނީ ހަމައެކަނި ހައްޖު މޫސުމުގައި ކަމަށާއި، ސައުދީ އާއި ސީރިއާ އާއި ދެމެދު ދާއިމީ ކޮށް ސީދާ ފްލައިޓްތައް ދަތުރުކުރުމާއި ގުޅޭގޮތުން އިތުރަށް މަޝްވަރާ ކުރަމުން އަންނަ ކަމަށެވެ.
ސައުދީ އާއި ސީރިއާއާއި ދެމެދު މީގެ 12 އަހަރު ކުރިން، 2012 ވަނަ އަހަރު، ހައްޖުވެރިންގެ ދަތުރުތައް ހުއްޓާލީ ދެ ގައުމުގެ ދެމެދުގައި އޮތް ގުޅުން ކެނޑުމާއި ގުޅިގެންނެވެ. ނަމަވެސް ދާދި ފަހުން ދެގައުމުގެ ދެމެދުގައި އަލުން ގުޅުން ގާއިމުކޮށްފައިވާއިރު، ސައުދީ އިން ވަނީ ސީރިއާ އަށް ސަފީރަކުވެސް ކަނޑައަޅާފައެވެ.
ހަމައެއާއިއެކު، ސީރިއާގެ ރައީސް ބައްޝާރުލް އަސަދު ވަނީ ސައުދީ އަރަބިއްޔާގައި ބޭއްވި އަރަބި ސަމިޓުގައި 13 އަހަރު ފަހުން ބައިވެރިވެވަޑައިގެން، ސައުދީ އާއި އެކު އޮތް ގުޅުން ބަދަހިކުރުމާއި ބެހޭ ގޮތުން މަޝްވަރާކުރައްވާފައެވެ.
Advertisement
This content is created and paid for by advertisers and does not involve Voice Journalists
