ރާއްޖޭގެ މަޝްރޫއުތަކަށް ތިމާވެއްޓާ ގުޅޭ މާލީ ފަހިކަން ހޯދުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ކުރައްވާ މަސައްކަތް ބޭރު ދުނިޔޭގެ ސަމާލުކަމަށް އަތުވެއްޖެއެވެ. 

ހަތަރުވަނަ އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް) ގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިވަގުތު ހުންނެވީ އެންޓިގާގައެވެ.

އަދި މިކޮންފަރެންސްގެ އެއް ނައިބު ރައީސްގެ ހައިސިއްޔަތުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ހޯމަ ދުވަހު މެންދުރު ކުރިއަށްދިޔަ ޕްލެނަރީ ސެޝަންގެ ރިޔާސަތު ބަލަހައްޓަވާފައެވެ. 

"ޗާރޓިންގ ދި ކޯސް ޓުވަރޑްސް ރެޒިލިއެންޓް ޕްރޮސްޕެރިޓީ" ގެ ތީމްގެ ދަށުން ކުރިއަށްދާ މި ކޮންފަރެންސްގައި މަޢުލޫމާތު މުއްސަނދި ބަހުސްތަކާއިއެކު، ސިޑްސްއާ ގުޅޭ ބިނާކުރަނިވި ހައްލުތައް ކުރިއެރުވުމަށް ފުޅާ ދާއިރާއެއްގައި ވަނީ މަޝްވަރާކޮށްފައެވެ.

އެފަހުން އެ ކޮންފަރެންސްގެ އިންޓެރެކްޓިވް ޑައިލޮގް: 'ރިވިޓަލައިޒިން ސިޑްސް އިކޮނޮމީއީސް ފޯރ އެކްސިލެރޭޓެޑް އެންޑް ސަސްޓެއިނަބަލް ގުރޯތު' ގެ ކޯޗެއަރގެ ހައިސިއްޔަތުން، މި ޑައިލޮގްގެ ރިޔާސަތު ބެލެހެއްޓުމުގައި ވެސް އެމަނިކުފާނު ވަނީ ބައިވެރިވެވަޑައިގެންފައެވެ.

ކޯޗެއަރގެ ހައިސިއްޔަތުން އިންޓެރެކްޓިވް ޑައިލޮގް ހުޅުވުމުގެ ރަސްމިއްޔާތު އަދި ނިންމުމުގެ ރަސްމިއްޔާތުގައި ރައީސުލްޖުމްހޫރިއްޔާ ތަޤުރީރު ކުރެއްވިއެވެ.

ރައީސުލްޖުމްހޫރިއްޔާ، ސިޑްސް ކޮންފަރެންސްގައި ކުރައްވަމުންދާ އެ މަސައްކަތަށް ބޭރު ދުނިޔޭގެ ސަމާލުކަން ވަނީ ލިބިފައެވެ. އެގޮތުން، ބީބީސީން ވަނީ ދިވެހި ރާއްޖޭގެ ތިމާވެށީގެ ނާޒުކު ކަމާއި އެކަމުން އަރައިގަތުމަށް ރާއްޖެއިން ކުރަމުންދާ މަސައްކަތްތައް އަލިއަޅުވާލައި ރިޕޯޓެއް ގެނެސްފައެވެ. 

އެ ރިޕޯޓްގައި ވަނީ މޫސުމީ ބަދަލުތަކުގެ ސަބަބުން އަންނަ ގޮންޖެހުންތަކަށް މާލީ އެހީތެރިކަން ހޯދުމަކީ ދަތި ކަމެއް ނަމަވެސް، ދިވެހިރާއްޖެ މިހާރު އަންނަނީ އެމަސައްކަތުގައި ކުރިއެރުން ހޯދަމުން ކަން ފާހަގަކޮށްފައެވެ. އެގޮތުން،  އެ ރިޕޯޓްގައި ވަނީ ރައީސް މުޢިއްޒު ސިޑްސް ކޮންފަރެންސްގެ ތެރެއިން ކުރައްވަމުންދާ މަސައްކަތާއި، އެ ކޮންފަރެންސްގައި ކޯޗެއަރ ކުރައްވަމުންދާ ކަން ފާހަގަކޮށްފައެވެ. 

އަދި މީގެ އިތުރުން، އެ ރިޕޯޓްގައި ރާއްޖޭގެ ސްޕެޝަލް އެންވޯއީ ފޯ ކްލައިމެޓް ޗޭންޖް އަލީ ޝަރީފްގެ ބަސްދީގަތުމެއްވެސް ހިމަނާފައިވާއިރު، އެ ބަސްދީގަތުމުގައި ޝަރީފްވެސް ވަނީ މޫސުމީ ބަދަލުތަކުގެ ސަބަބުން ކުރިމަތިވާ ގޮންޖެހުންތައް އަރައިގަތުމަށް ސަރުކާރުން ކުރިއަށް ގެންދާ މަޝްރޫއު ތަކާއި، ސަރުކާރުގެ ސިޔާސަތާއި، އެ ކަންކަމަށް ފައިސާ ހޯދުމަށް ހުރި ދަތިތަކުގެ މައްޗަށް އަލިއަޅުވާލައްވާފައެވެ.

ރައީސް މުޢިއްޒު ސިޑްސްގައި ކޯ ޗެއަރ ކުރައްވައި ދެއްވި ތަގުރީރުގައި ވަނީ ދެމެހެއްޓިނިވި ތަރައްޤީގެ ލަނޑުދަނޑިތައް ހާސިލުކުރުމުގައި ކުދިޖަޒީރާ ޤައުމުތަކަށް އަތްފޯރާފަށުގައި މާލީއެހީތެރިކަން ލިބުމަކީ ނުވަތަ ނުލިބުމަކީ އިންސާފާ ގުޅިފައިވާ ސުވާލެއްކަމުގައި ވިދާޅުވެފައެވެ.

ެއެމަނިކުފާނުގެ ވާހަކަފުޅުގައި، ބޭރުން އަންނަ ޝޮކްތަކާއި މޫސުމަށް އަންނަ ނޭދެވޭ ބަދަލުތަކުގެ ސަބަބުން ކުރާ އަސަރުތަކާއި އެކަށީގެންވާ މިންވަރަށް ފައިނޭންސް ނުލިބުމާއި ދެމެހެއްޓެނިވި ނޫން ދަރަނި ފަދަ ތަރައްޤީވަމުން އަންނަ ކުދިޖަޒީރާ ޤައުމުތަކަށް ކުރިމަތިވާ ގޮންޖެހުންތަކުގެ މައްޗަށް އަލިއަޅުވާލެއްވިއެވެ. އަދި މި ގޮންޖެހުންތަކާ އުނދަގޫ ތަކުގެ ތެރޭގައި ވެސް ތަރައްޤީވަމުން އަންނަ ކުދި ޖަޒީރާ ޤައުމުތަކުން ވިލުންތެރިކަމާއެކު ކުރިޔަށްދާތީ އެމަނިކުފާނު އެކަމަށް ތައުރީފުކުރެއްވިއެވެ.

މީގެ އިތުރުން، ރައީސުލްޖުމްހޫރިއްޔާގެ ވާހަކަފުޅުގައި، މާލީ އެހީއަކީ ސިޑްސްއަށް ކުރިމަތިވެފައިވާ އެންމެ ބޮޑު އެއް ގޮންޖެހުންކަން ފާހަގަކުރައްވައި، ތަރައްޤީއަށް ޓަކައި ފަސޭހައިން މާލީއެހީތައް ލިބޭނެގޮތް ފަހިވާންޖެހޭކަމަށާއި އަދި އެގޮތަށް ކުދިޖަޒީރާ ޤައުމުތަކަށް އަތްފޯރާފަށުގައި މާލީއެހީތެރިކަން ލިބުމަކީ ނުވަތަ ނުލިބުމަކީ އިންސާފާ ގުޅިފައިވާ ކަމެއްކަންވެސް އެމަނިކުފާނު ފާހަގަކުރެއްވިއެވެ.