ދިވެހި ދައުލަތަށް އަދި ޕީޕީއެމް ޕީއެންސީ އަށްގިނަގުނަ ޚިދުމަތްތަކެއް ކޮށްދެއްވި، އަލްފާޟިލް އަޙްމަދު ޙާފިޒް އަވަހާރަވުމާ ގުޅިގެން އެ މަރްހޫމްގެ ޢާއިލާއަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ތަޢުޒިޔާ ދަންނަވައިފިއެވެ.
ކެންސަރުބަލީގައި ގިނަ ދުވަސްތަކެއް ހޭދަ ކުރެއްވުމަށްފަހު ހާފިޒް އަވަހާރަވެފައިވަނީ އައިޖީއެމްއެޗްގައި ފަރުވާ ހޯއްދަވަމުން ގެންދަވަނިކޮށް މިއަދުގެ ހެނދުނުގެ ވަގުތެއްގައެވެ.
މަރުހޫމް ހާފިޒް އަވަހާރަ ވުމާއި ގުޅިގެން ރައީސް މުޢިއްޒު ކުރެއްވި ޕޯސްޓެއްގައި ވަނީ ހާފިޒަކީ ޚާއްސަ ގޮތެއްގައި ރާއްޖޭގެ ކުޅިވަރަށް އަގުނުކުރެވޭފަދަ މުޙިންމު ޚިދުމަތްތަކެއް ކުރެއްވި ބޭފުޅެއްކަން ފާހަގަކުރައްވާފައެވެ.
އަދި އެ މަރްހޫމްގެ ޢާއިލާއަށް ތަޢުޒިޔާ ދަންނަވައި، މަރްހޫމްގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރުކުރެއްވުން އެދި ރައީސް މުޢިއްޒު ވަނީ ދުޢާ ކުރައްވާފައެވެ.
ހާފިޒަކީ ރާއްޖޭގައި މަސްވެރިކަމުގެ ދާއިރާގެ ކުރިއެރުމަށް ވަރަށް ގިނަ ހިދުމަތްތަކެއް ކުރެއްވި ބޭފުޅެކެވެ. އެގޮތުން މަސްވެރިކަމާ ބެހޭ ވުޒާރާގެ ވަރަށް ގިނަ މަގާމުތައް ފުރުއްވާފައިވެއެވެ.
މީގެ އިތުރުން، ކުޅިވަރުގެ މައިދާނުގައުވެސް ހާފިޒްގެ ޚިދުމަތްތައް ގިނަގުނައެވެ. އެގޮތުން، ބާސްކެޓަށާއި، ދިވެހި ފުޓްބޯޅަ އަށް ވެސް އޭނާ ވަނީ ގިނަ ހިދުމަތް ތަކެއް ކުރައްވާފައިވާއިރު ކުލަބް ވެލެންސިއާއަށް ކުރެއްވި ހިދުމަތް ފާހަގަކޮށްލެވެއެވެ.
ހަމަ އެހެންމެ ހާފިޒްވަނީ، އަހްމަދިއްޔާގެ އެސިސްޓެންޓް ޕްރިންސިޕަލްގެ މަގާމު ވަރަށް ދިގު މުއްދަތަކަށް ފުރުއްވައި އެ ސުކޫލަށް ވަރަށް ދިގު މުއްދަތަކަށް ހިދުމަތް ކުރައްވާފައެވެ.
Advertisement
This content is created and paid for by advertisers and does not involve Voice Journalists
