ފަލަސްޠީނުގެ ބިމަށް ގަދަކަމުން ވެރިވެގެންފައިވާ ޒަޔަނިސްޓް ޔަހޫދީން، ފަލަސްތީނުގެ މުސްލިމުންނާއި ދެކޮޅަށް ހިންގަމުންދާ ޤަތުލު ޢާއްމާއި އެ އަނިޔާވެރިކަން ނިމުމަކަށް ގެނައުމަށް ކުރެވެން ހުރި އެއްވެސް ކަމެއް، ނުކޮށް ހުންނަ ކޮންމެ މީހަކު ފާފަވެރި ވާނެ ކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝެއިޚް އަހުމަދު ސަމީރު ވިދާޅުވެއްޖެއެވެ.

ޝެއިޚް ފޭސްބުކުގައި ކުރެއްވި ޕޯސްޓެއްގައި ވިދާޅުވީ، ފަލަސްޠީނުގައި ހިނގާ ހަނގުރާމައަކީ ދެ ޤައުމެއްގެ އިމުގެ ހަނގުރާމައެއް ނޫން ކަމަށެވެ. އެހެނެއްކަމަކު އެއީ މުޅި އިސްލާމީ އުންމަތުގެ ޢަޤީދާއާއި، މުޤައްދަސާތުތަކާއި ތާރީޚާ ގުޅުންހުރި ، މުޅި އުންމަތާ ދެކޮޅަށް އުންމަތުގެ އެންމެ ބޮޑު ދުޝްމަނުން ކުރަމުންދާ ނަސްލު ނައްތާލުމުގެ ހަނގުރާމައެއް ކަމަށެވެ. 

އަދި އެއީ ހަމައެކަނި ދެ ޤައުމެއްގެ މައްސަލައަކަށް ފަލަަސްޠީނުގެ މައްސަލަ ހަނިކުރުމީ ޒަޔަނިސްޓުން މުސްލިމުންނަށް ލައިދެމުން ދާ ރިވާޔަތެއް ކަމަށްވެސް ޝެއިޚް ވަނީ ވުދާޅުވެފައެވެ. 

ފަލަސްތީނުގެ މިނިވަން ކަމަށްޓަކައި ޖިހާދު ކުރަމުންދާ ހަމާސް ޖަމާއަތުން އިޒްރޭލަށް މިދިޔަ އަހަރުގެ އޮކްޓޯބަރ މަހުގެ ހަތްވަނަ ދުވަހު ދިން ކުއްލި ހަމަލާތަކަށްފަހު އިޒްރޭލުން ވަނީ ފަލަސްތީނާ ދެކޮޅަށް ހަނގުރާމަ އިއުލާންކޮށްފަ އެވެ.

އެއާއެކު އިސްރާއީލުން އަންނަނީ ކެނޑިނޭޅި ފަލަސްތީނަށް ބޮން އަޅައި ގަތުލު ޢާއްމު ހިންގަމުންނެވެ. އެގޮތުން ދާދިފަހުން ވަނީ ޣައްޒާގެ ދެކުނުން އޮންނަ ރަފާހުގެ ހުޅަނގުގައި ގެދޮރުގެއްލިފައިވާ މީހުން ބޯހިޔާވަހިކަން ހޯދަމުން ދިޔަ ޓަލް އައްސުލްތާނުގައި ހުންނަ ބްރިކްސް ކޭމްޕަށް ހަމަލާދީފައެވެ. އެގޮތުން ހަމަލާ ދީފައިވަނީ 8 ނުވަތަ 10 ވަރަކަށް ގޮވާ ޒާތުގެ ތަކެތި ބޭނުން ކޮށްގެންނެވެ. 

މި ހަމަލާ ދިނުމާއެކު އެތަނުގައި އަލިފާން ރޯވެ، އަލިފާންގަނޑު ފެތުރުނެވެ. އަދި އެތަނުގައި ނިދާފައި ތިބި އެތައް ބައެއްގެ ގައިގައި ރޯވިއިރު، ދިރިތިއްބާ ވަނީ ދުނިޔެ ދޫކޮށްފައެވެ.

ޣައްޒާގެ ސިއްހަތާ ބެހޭ ވުޒާރާއިން ބުނީ ރަފަހުގައި ގެދޮރު ގެއްލިފައިވާ މީހުންނަށް އިސްރާއީލުން ދިން ހަމަލާގައި މިހާތަނަށް 45 އަށްވުރެ ގިނަ މީހުން ޝަހީދުވެފައިވާ ކަަމަށެވެ.

މީގެ އިތުރުން ޔަހޫދީން ފަށާފައިވާ ގަތުލު އާއްމުގައި މިހާތަނަށް 40،000 އަށްވުރެ ގިނަ މުސްލިމުން ޝަހީދުވެފައިވާއިރު އޭގެ ތެރެއިން ބޮޑު އިންސައްތަ އަކީ ކުޑަ ކުދިންނާއި އަންހެނުންނެވެ.