މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ލ. ކައްދޫގައި ކުރިއަށްގެންދިޔަ ތަމްރީނެއްގެ ތެރެއިން މިޔަރެއް ހަމަލާދިނުމާއި ގުޅިގެން ނިޔާވި ކޯޕްރަލް މުޙައްމަދު ޒައިދާންގެ ޖަނާޒާ ރަސްމީ ޢިއްޒަތުގައި، އޭނާގެ އުފަށް ރަށް، ރ.އުނގޫފާރުގައި ބާއްވައިފިއެވެ.
ރަސްމީ ޢިއްޒަތުގެ ދެވަނަ ދަރަޖައިގައި ބޭއްވި މި ޖަނާޒާގައި ސިފައިން ވަނީ ހަތް ބަޑީގެ ސަލާމެއް އަރުވާފައެވެ.
އެމްއެންޑީއެފުން ބުނީ މިއަދުގެ އަސްރު ނަމާދަށްފަހު، އުނގޫފާރު އިސްލާމީ މަރުކަޒުގައި ޒައިދާން ގެ ޖަނާޒާ ބާއްވާފައިވާއިރު، މި ޖަނާޒާގައި އެމްއެންޑީއެފް ނޮދަން އޭރިއާ ކޮމާންޑްގެ ކޮމާންޑަރ، ބްރިގޭޑިއަރ ޖެނެރަލް އިސްމާޢީލް ޝަރީފާއި، އެޖުޓަންޓް ޖެނެރަލް، ބްރިގޭޑިއަރ ޖެނެރަލް ޢަބްދުﷲ އިބްރާހީމާއި، ކޯސްޓްގާޑްގެ ކޮމަޑާންޓް ބްރިގޭޑިއަރ ޖެނެރަލް މުޙައްމަދު ސަލީމް ބައިވެރިވެ ވަޑައިގެންފައިވާ ކަމަށެވެ.
މި ބޭފުޅުންގެ އިތުރުންވެސް، ރ. އުނގޫފާރުގެ ގިނަ އަދަދެއްގެ ރައްޔިތުން ވަނީ ޒައިދާން ގެ ޖަނާޒާގައި ބައިވެރިވެފައެވެ.
ޒައިދާން ގެ ޖަނާޒާގެ ތެރެއިން-- ފޮޓޯ: އެމްއެންޑީއެފް
ޒައިދާން ނިޔާވެފައިވަނީ، ސިފައިންގެ ހައި ރިސްކް ތަމްރީނެއް ފުރިހަމަ ކުރަމުން ދަނިކޮށް، މި މަހުގެ 2 ވަނަ ދުވަހު ލ.މާވަށްކައިރީ ކަނޑުގެ ސަރަހައްދުގައި ހިނގި ހާދިސާއެއްގައި، ލިބުނު އަނިޔާތަކަށް ފަރުވާދެމުން ދަނިކޮށް ރޭ 8:40 ހާއިރު ލ.ގަން ރީޖަނަލް ހޮޮސްޕިޓަލްގައެވެ.
ޒައިދާން ނިޔާވުމާ ގުޅިގެން އެކަމުގެ ހިތާމައިގައި، މިއަދުން ފެށިގެން ދެ ދުވަސް ވަންދެން ސިފައިންގެ ދިދަ، ސިފައިންގެ މަރުކަޒުތަކުގައި ބައި ދަނޑިއަށް ތިރިކުރުމަށް ނިންމާފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
