އިސްރަށްވެހިން އެމްއެންޑީއެފްގެ ކޯސްޓްގާޑް ޝިޕް ހުރަވީއަށް ޒިޔާރަތްކޮށްފިއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނީ، މާލޭގައި ހުންނަ އިސްރަށްވެހިންގެ ނާދީއިން އިންތިޒާމުކޮށްގެން ކުރިއަށްގެންދިޔަ މި ހަރަކާތުގައި 32 ފަރާތަކުން ބައިވެރިވިކަމަށެވެ.
މިއީ އެފަރާތްތަކަށް މުޅިން އައު މާޙައުލެއްގައި އުފާވެރި ވަގުތުކޮޅެއް ހޭދަކުރުމަށް ލިބުނު ފުރުޞަތެއްކަން ޢާއިލީ ތަރައްޤީއާ ބެހޭ ވުޒާރާއިން ފާހަގަކުރިއެވެ.
އެވުޒާރާއިން ބުނީ، އެމްއެންޑީއެފްގެ މާލެ އޭރިއާ ކޮމާންޑާއި އެމްއެންޑީއެފްގެ ކޯސްޓްގާޑް ޝިޕް ހުރަވީއާ ގުޅިގެން ކުރިއަށް ގެންދެވުނު މިހަރަކާތަކީ މީގެކުރިން އިސްރަށްވެހިންނާއެކު ކުރިއަށްގެންދެވިފައިވާ ހަރަކާތްތަކާ ވަރަށް ތަފާތު ހަރަކާތެއް ކަމަށާއި، މިޒިޔާރަތުގައި އިސްރަށްވެހިންނަށް ކޯސްޓްގާޑުގެ ތާރީޚާއި ކޯސްޓްގާޑް ޝިޕް ހުރަވީއާގުޅޭ މުހިންމމު މަޢުލޫމާތުތަކެއް ހިއްސާކުރެވިފައިވާ ކަމަށެވެ.
މީގެ އިތުރުންވެސް،ި މި މަނަވަރުގައި ބޭނުންކުރާ އެކިކަހަލަ އާލާތްތައް ބައިވެރިންނަށް ދައްކާލައި، އެއާގުޅޭ މަޢުލޫމާތުތައްވެސް އިސްރަށްވެހިންނާއި ހިއްސާކުރެވިގެންދިޔަ ކަމަށް ޢާއިލީ ތަރައްޤީއާ ބެހޭ ވުޒާރާއިން ހާމަކުރެއެވެ.
Advertisement
This content is created and paid for by advertisers and does not involve Voice Journalists
