މިއަހަރުގެ ހައްޖު މޫސުމުގައި ސައުދީ އަރަބިއްޔާގެ ފިނި ހޫނުމިން އާއްމު މިންގަނޑަށްވުރެ މަތިވާނެ ކަމަށް ލަފާކޮށް، ހޫނު މިން ދަށް ކުރުމަށްޓަކައި ފިޔަވަޅު ތަކެއް އަޅަން ނިންމައިފިއެވެ.
އެގޮތުން ސައުދީ އަރަބިއްޔާގެ ރޯޑްސް ޖެނެރަލް އޮތޯރިޓީއިން ވަނީ ނަމިރާ މިސްކިތް ވަށައިގެން އޮންނަ މަގުތަކުގައި ހުދު ކުލައިގެ ކޯޓިން އެއް އަޅަންފަށާފައެވެ.
ސައުދީ ޕްރެސް އިން ރިޕޯޓް ކުރާ ގޮތުގައި މިއީ ހޫނުމިން 20 ޑިގްރީ އަށް ދަށްކޮށްދޭނެ ކޯޓިންއެކެވެ. މި މަސައްކަތުގެ ތެރެއިން ނަމިރާ މިސްކިތުގެ ވަށައިގެންވާ 25,000 ސްކުއެއާ މީޓަރު ގައި ވަނީ މިހާރު މި ކޯޓިން ލައި ފުރިހަމަ ކޮށްފައެވެ.
ސައުދީ ސަރުކާރުން މިދިޔަ އަހަރުވެސް ހައްޖު މޫސުމާއި ދިމާކޮށް، ހައްޖުވެރިން ހަރަކާތްތެރިވާ މަގުތަކުގައި ވަނީ މިފަދަ ކޯޓިންއެއް ލައިފައެވެ. އެކަމުގެ ސަބަބުން އެ މަގުތަކުގެ ފިނިހޫނުމިން 15 ސެލްސިއަސް އަށް ދަށްކޮށްދިން ކަމަށް ނޫސްތަކުން ރިޕޯޓް ކުރެއެވެ.
ހޫނު ގަދަވުމާއި ގުޅިގެން މިދިޔަ އަހަރުވެސް ހީޓް ސްޓްރެސް ގެ ކޭސްތަކެއް ފެންމަތިވިއިރު، ސައުދީ ސަރުކާރުން ވަނީ މިއަހަރުގެ ހައްޖު މޫސުމުގައި ހޫނުމިން 44 ޑިގްރީ ސެލްސިއަސް އަށް ވުރެ މައްޗަށް ދާނެ ކަމަށް ލަފާކޮށްފައެވެ. އަދި ވައިގެ ތެތްފިނިކަން ހުންނާނީ 25 އިންސައްތަ އަށް ކަމަށާއި، ވާރޭ ނުވެހޭނެ ކަމަށް ވެސް ސައުދީ ސަރުކާރުން ލަފާކުރެއެވެ.
މި އަހަރުގެ ހައްޖު މޫސުން ފެށޭނީ ޖޫން މަހުގެ 14 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
