ޙައްޖުގެ މަތިވެރި އަޅުކަން އަދާކުރުމަށް މިހާތަނަށް 1.2 މިލިއަނަށް ވުރެ ގިނަ ޙައްޖުވެރިން ސައުދީ އަރަބިއާއަށް އެތެރެވެފައިވާ ކަމަށް އެގައުމުން ބުނެފިއެވެ.

ސައުދީގެ ހައްޖާއި އުމްރާއާއި ބެހޭ މިނިސްޓަރު ޑރ.ތައުފީޤް އަލް ރަބިއާ ވިދާޅުވީ، އެ ހުރިހާ ޙައްޖުވެރިން ވެސް އެގައުމަށް ފަސޭހަކަމާއި އެކު އެތެރެވެފައިވާ ކަމަށާއި، ހުރިހާ އެންމެންގެ ހާލުވެސް ރަނގަޅު ކަމަށެވެ.

މިނިސްޓަރު ވިދާޅުވީ، ހަތް ގައުމެއްގެ 11 އެއާޕޯޓަކުން ދަތުރުކުރާ ޙައްޖުވެރިންނަށް އެމީހުންގެ ދަތުރުކުރާ އެއާޕޯޓްތަކުގައި ސައުދީ އަރަބިއްޔާއަށް އެތެރެވުމަށް ބޭނުންވާ ފޯމަލިޓީތައް ފުރިހަމަ ކުރުމުގެ ފުރުސަތު ފަހިކޮށްދޭ ގޮތަށް ހަމަޖެއްސުމާއި ގުޅިގެން، ސީދާ މައްކާ އާއި މަދީނާއަށް އެތެރެވެވޭ ރާސްތާ މެދުވެރިކޮށް 250,000 ޙައްޖުވެރިން އެތެރެވެފައިވާ ކަމަށެވެ.

އަލްރަބިޔާ ވަނީ ޙައްޖުވެރިންނަށް ބޭނުންވާ ހުރިހާ ކަމެއް ވެސް އެންމެ ފުރިހަމަ އަށް ފޯރުކޮށްދޭނެ ކަމުގެ ޔަގީންކަން ދެއްވާފައެވެ. އެގޮތުން ހައްޖުވެރިންނަށް ފޯރުކޮށްދޭ ހިދުމަތުގެ ފެންވަރު ރަނގަޅު ކުރުމަށްޓަކައި ހައްޖުގެ ކަންތައްތަކުގައި އުޅޭ 120,000 ގިނަ މުއައްޒަފުންނަށް ތަމްރީނު ފޯރުކޮށްދީފައިވާ ކަމަށާއި، ހައްޖުވެރިންގެ ރައްކާތެރިކަމަށްޓަކައި ތަފާތު ގަވާއިދުތައް ވެސް އެކުލަވާލައިފައިވާ ކަމަށެވެ.

ސައުދީ އަށް ހަނދު ފެނުމާއި ގުޅިގެން މިއަހަރުގެ ހައްޖު މަސް މިމަހުގެ 7 ވަނަ ދުވަހު ފެށިފައިވާއިރު، ޢަރަފާތު ދުވަހަކީ މިމަހުގެ 15 ވަނަ ދުވަހެވެ. އަދި އަޟްހާ އީދު ދުވަހަކީ މި މަހުގެ 16 ވަނަ ދުވަހެވެ.