2021 ވަނަ އަހަރު، ފުވައްމުލަކު ހޮސްޕިޓަލުގައި ފަރުވާދެމުން ދަނިކޮށް ކުއްލި ގޮތަކަށް ނިޔާވި ފަސް އަހަރުގެ ސަދާ ސައުދުالله ގެ މަރުގެ މައްސަލައިގައި، ފުވައްމުލަކު ހޮސްޕިޓަލުން އިހުމާލުވިކަމަށް އިންކާރުނުކުރާ ނަމަ، ގެއްލުމުގެ ބަދަލާއި ގުޅޭގޮތުން މަޝްވަރާކުރެވިދާނެ ކަމަށް ސަދާގެ އާއިލާއިން ބުނެފިއެވެ.
މި މައްސަލައިގައި ހޮސްޕިޓަލުގެ އިހުމާލު އޮތް ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ނިންމާފައިވާއިރު، މިނިސްޓްރީ އޮފް ހެލްތުންވެސް ވަނީ ސަދާގެ މަރުގެ މައްސަލައިގައި ހޮސްޕިޓަލުގެ އިހުމާލު އޮތް ކަމަށް އިއުތިރާފްވެފައެވެ.
ސަދާގެ މަރުގެ މައްސަލައިގެ ފުރަތަމަ އަޑުއެހުން މިއަދު ހެނދުނު 11:00 ޖެހިއިރު، ސިވިލް ކޯޓުގައި ކުރިއަށް ގެންގޮސްފައިވާއިރު، އަޑުއެހުމުގައި، މި މައްސަލަ ކޯޓުން ބޭރުގައި ހައްލުކުރުމަށް ވަނީ ދެދުވަހުގެ މުއްދަތެއް ދީފައެވެ.
މިއަދު ބޭއްވި އިބްތިދާއީ އަޑުއެހުމުގައި މިނިސްޓްރީ އޮފް ހެލްތު ތަމްސީލު ކުރާ ބަންޑާރަ ނައިބުގެ އޮފީހުން ވަނީ މި ދައުވާ ހުށަހަޅާފައިވަނީ މާ ލަހުން ކަމަށާއި، ސިވިލް ކޯޓުގެ ފޯމުތަކުގެ ތެރެއިން ރަނގަޅު ފޯމަކު ނޫންކަމަށް ބުނެ، މައްސަލަ ކޯޓަށް ނުބެލޭނެ ކަމަށް ބަޔާންކޮށްފައެވެ.
މިކަމާއި ގުޅިގެން ސިވިލް ކޯޓުން ބުނީ، 16 ޖޫން 2022 ގައި ވުޖޫދަށްއައި، މަދަނީ އިޖުރާއާތުގެ ކުރިން، އިހުމާލުގެ އަމަލެއްގެ ސަބަބުން ގެއްލުމުގެ ބަދަލު ހޯދުމަށް ދައުވާ ހުށަހެޅުމާއި ގުޅޭ ތަގާދުމުގެ ގާނޫނެއް ނެތް ކަމަށެވެ. އެގޮތުން މި މައްސަލައިގައި ހާދިސާ ހިނގާފައިވަނީ 2021 ވަނަ އަހަރުގެ އޮކްޓޫބަރު މަހުގެ 3 ވަނަ ދުވަހުކަން އެނގެން އޮތް ކަމަށާއި، މައްސަލަ ހުށަހެޅުނު ދުވަހާއި ހަމައަށް ތިން އަހަރު ދުވަސް ފާއިތުވެފައިނުވާކަން ކޯޓުން ފާހަގަކުރިއެވެ.
މި ދައުވާ ހުށަހަޅަން ޖެހޭނީ ޖިސްމާނީ ދައުވާ އާއި ގުޅޭ ފޯމުން ކަމަށްވީ ނަމަވެސް މައްސަލަ ހުށަހަޅާފައިވަނީ އިޚްތިލާފް އޮންނަ ބާވަތުގެ ދައުވާ ފޯމުން ކަމަށް ދައުލަތުން ފާހަގަކުރުމުން، ޝަރީއަތުން ބުނީ، މިއީ އިހުމާލުން ލިބޭ އަނިޔާގެ މައްސަލަތައް ފިޔަވައި އެހެނިހެން އިހުމާލުގެ ސަބަބުން ލިބޭ ގެއްލުމުގެ ބަދަލު ހޯދުމުގެ މައްސަލައަކަށް ވާތީ އެފަދަ ކަންކަމަށް ވަކި ފޯމެއް ހާއްސަ ކޮށްފައިނުވާއިރު، މައްސަލަ ހުށަހަޅާފައިވަނީ ރަނގަޅަށް ކަމަށެވެ.
އެހެންކަމުން މި ދައުވާ ކޯޓުގައި ކުރިއަށް ނުގެންދެވޭނެ ކަމަށް ދައުލަތުން ފާހަގަކުރި ނުކުތާތަކުގައި އެއްވެސް އަސާސެއް ނެތް ކަމަށް ސިވިލް ކޯޓުން ނިންމިއެވެ. އެއާއިއެކު ސިވިލް ކޯޓުން ވަނީ ޝަރީއަތުގެ އިޖުރާއަތު ނަހަމަ ގޮތުގައި ބޭނުން ނުކުރުމަށް ދައުލަތުގެ ވަކީލުންނަށް ނަސޭހަތްތެރިވެފައެވެ.
މި އަޑުއެހުމާއި ގުޅޭގޮތުން "ވޮއިސް" އަށް މައުލޫމާތު ދެއްވަމުން ސަދާގެ އާއިލާ ތަމްސީލްކުރައްވާ ވަކީލު މަރިޔަމް ޝުނާނާ ވިދާޅުވީ، ސަދާގެ މަރުގެ މައްސަލައިގައި ދައުލަތުން ސިޓީއެއް ހުށަހެޅުމުން އެޗްއާރުސީއެމްގެ ނިންމުމާއި އެކު ހެލްތު މިނިސްޓްރީން ވެސް އިއުތިރާފްވެފައިވާތީ، އެކަމަށް އިންކާރު ނުކުރާކަމަށް ވާނަމަ ގެއްލުމުގެ ބަދަލާއި ގުޅޭ ގޮތުން މަޝްވަރާ ކުރެވިދާނެ ކަމަށާއި، ކޯޓުން ބޭރުގައި މައްސަލަ ހައްލު ކުރެވިދާނެ ކަމަށް ޖަވާބުދިން ކަމަށެވެ. އެހެންނަމަވެސް، ބަދަލު ދޭން ނުޖެހޭނެ ކަމަށް ބުނެ މީގެ ކުރިން ދައުލަތުން ހުށަހެޅިކަަމަށް ވެސް އޭނާ ވިދާޅުވިއެވެ.
ޝުނާނާ ވިދާޅުވީ ހެލްތު މިނިސްޓްރީން އިއުތިރާފްވެފައިވާއިރު، އިހުމާލުވާކަމަށް އިންކާރުކުރާ ކަމަށްވާނަމަ، ކޯޓުން ބޭރުގައި ހައްލުކުރަން އާއިލާއިން ބޭނުންނުވާ ކަމަށާއި، އެފަދައިން އިންކާރު ކުރާކަމަށް ވާނަމަ ޝަރީއަތް ކުރިއަށް ގެންދަން އާއިލާއިން ބޭނުންވާކަމަށެވެ.
"އިހުމާލަށް އިންކާރުކުރާކަމަށް ވާނަމަ ޝަރީއަތް ކުރިއަށްގެންދަން ބޭނުންވަނީ. އަސްލު ގެއްލުމުގެ ފައިސާއެއްނޫން ބޭނުންވަނީ އާއިލާއިން. ބޭނުންވަނީ އިހުމާލުވި ކަމަށް އެއްބަސްވާން. ގެއްލުމުގެ ބަދަލަށް ގާތްގަނޑަކަށް ގާނޫނީ ގޮތުން ހިސާބުކޮށްފައި އަންނަނީ ގާނޫނީ ގޮތުން ދޭން ޖެހޭނެ ވެލިއު އަކަށް އަންނަނީ 28 މިލިއަން"
ޝުނާނާ ވިދާޅުވިއެވެ.
ގެއްލުމުގެ ބަދަލުގެ ގޮތުގައި ލިބޭ ފައިސާ އަށް ވުރެ ބޮޑަށް އާއިލާއިން ބޭނުންވަނީ ސަދާގެ މަރުގެ މައްސަލައިގައި އިހުމާލުވިކަމަށް ދައުލަތުގެ އިދާރާތަކުން އެއްބަސްވުން ކަމަށާއި، އެފަދައިން އިންކާރުނުކުރާ ނަމަ، ގެއްލުމުގެ އަދަދު ކުޑަކޮށްގެން ވެސް މައްސަލަ ހައްލު ކުރެވޭނެ ކަމަށް ޝުނާނާ ވިދާޅުވިއެވެ.
މިއާއިއެކު، ޝުނާނާ ވަނީ ސިއްހީ ފަރުވާ ދިނުމުގައި ރާއްޖޭގައި ފަރުވާކުޑަވުމުގެ ސަބަބުން ވަރަށް ބައިވަރު ކޭސްތައް އަންނަކަން ފާހަގަކުރައްވާ، މިފަދަ މައްސަލަތައް ޝަރީއަތާއި ހިސާބަށް ގޮސް ނިންމުމަށްވުރެ، މެޑިކަލް ކައުންސިލުން މައްސަލަ ނިންމައިގެން ގެއްލުމުގެ ބަދަލު އާއިލާތަކަށް ދިނުމަކީ އިންސާފަކަށް ވެގެންދާނެ ކަމަށް ވިދާޅުވެފައެވެ.
ސަދާގެ ބަނޑުގައި ރިއްސައި، ވަރަށް ގަދައަށް ހޮޑުލާތީ 2021 ވަނަ އަހަރުގެ އޮކްޓޯބަރު މަހުގެ ކުރީކޮޅު އެންމެ ފުރަތަމަ ގެންދިޔައީ ފުވައްމުލަކުގެ ފްލޫ ކްލިނިކަށެވެ. އެއީ ކޮވިޑްގެ އަލާމާތެއް ކަމަށް ބަލައި، ސަދާގެ ހާލަތު އިތުރަށް ގޯސްވާތީ ފްލޫ ކްލިނިކުން ސަދާ ފޮނުވާލީ ފުވައްމުލަކު ހޮސްޕިޓަލަށެވެ.
ސަދާ ނިޔާވީ 2021 އޮކްޓޯބަރު ތިން ވަނަ ދުވަހު ޑޮކްޓަރަށް ދެއްކުމުން ޖެހި، އިންޖެކްޝަނެއްގެ ސަބަބުން ކަމަށް އާއިލާ އިން ތުހުމަތުކޮށް، އެ މައްސަލަ ބަލައި ދިނުމަށް ހެލްތު މިނިސްޓްރީއަށް ހުށަހެޅިއެވެ. އާއިލާއިން ބުނެފައިވާ ގޮތުގައި ސަދާ މަރުވީ ހޮސްޕިޓަލުން އިންޖެކްޝަން ޖެހިތާ 5 މިނެޓް ތެރޭގައެވެ. އެ މައްސަލައާއި ގުޅިގެން މިނިސްޓްރީން ނެރުނު ރިޕޯޓުގައިވެސް އެކުއްޖާ އަށް ފަރުވާ ދިނުމުގައި ޑޮކްޓަރުންނާއި ނަރުހުން އިހުމާލުވެފައިވާ ކަމަށް ވަނީ ބުނެފައެވެ.
އެއާއިއެކު، މޯލްޑިވްސް މެޑިކަލް އެންޑް ޑެންޓަލް ކައުންސިލުން މި މައްސަލަ ބެލުމަށްފަހު ސަދާ އަށް ފަރުވާދިން ދެ ޑޮކްޓަރެއްގެ ލައިސަންސް ވެސް ސަސްޕެންޑު ކުރިއެވެ.
Advertisement
This content is created and paid for by advertisers and does not involve Voice Journalists
