ދަށު ކޯޓުތަކުގެ ފަނޑިޔާރުން ވެސް ޝަރީއަތްތަކުގައި ގައުން ލައިގެން ތިބެންޖެހޭ ގޮތަށް ދިވެހި ރާއްޖޭގެ ސުޕްރީމް ކޯޓުން ހަމަޖައްސައިފިއެވެ.
"ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ހެދުން އެޅުމުގެ އުސޫލު"ގެ ނަމުގައި ސުޕްރީމް ކޯޓުން އާއްމު ކުރި އުސޫލުގައިވާގޮތުން އަންނަ އޮކްޓޫބަރު މަހުގެ ފުރަތަމަ ދުވަހުން ފެށިގެން ދަށު ކޯޓުތަކުގެ ފަނޑިޔާރުން ޝަރީއަތް ކުރާއިރު ތިބެން ޖެހޭނީ ގައުނުގައިއެވެ.
ސުޕްރީމް ކޯޓުގެ ފަނޑިޔާރުންގެ އާއްމު މަޖިލީހުން ފާސްކުރި މި އުސޫލު އާއްމުކުރާ ތާރީހުން ފެށިގެން އެންމެ ގިނަވެގެން 4 މަސްދުވަހުގެ ތެރޭގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ފަނޑިޔާރުންނަށް ގައުން ފޯރުކޮށްދޭން ޖެހޭނެ ކަމަށް ވެސް އެ އުސޫލުގައިވެއެވެ. އަދި ކޮންމެ ދެ އަހަރުން އެއް އަހަރު ޑީޖޭއޭއިން ފަނޑިޔާރުންނަށް ގައުން ދޭންޖެހޭނެ ކަމަށް ވެސް ސުޕްރީމް ކޯޓުގެ މި އުސޫލުގައި ބަޔާންކޮށްފައިވެއެވެ.
މިހާތަނަށް އަމަލު ކުރަމުން އައި ގޮތަށް ބަލާއިރު، ފަނޑިޔާރުންގެ ތެރެއިން ގައުން ލާންޖެހެނީ ސުޕްރީމް ކޯޓާއި ހައި ކޯޓުގެ ފަނޑިޔާރުން އެކަންޏެވެ. އަދި ދަށު ކޯޓުތަކުގެ ފަނޑިޔާރުން މިހާރު ޝަރީއަތުގެ މަޖިލީހުގައި ތިބެން ޖެހެނީ ކަޅު ނުވަތަ ގަދަ ނޫކުލައިގެ ކޯޓު ފަޓުލޫނުގަ އެވެ.
Advertisement
This content is created and paid for by advertisers and does not involve Voice Journalists
