ނިމިދިޔަ ރައީސް އިބްރާހިމް މުޙައްމަދު ޞާލިހުގެ ވެރިކަމުގައި ކުރިއަށް ގެންދިޔަ "ގެދޮރުވެރިޔާ" ސްކީމްގެ ދަށުން ފްލެޓްތައް ދޫކުރުމުގައި އިސްކޮށް މަސައްކަތްކުރި ކޮމިޓީގައި ހިމެނޭ ބޭފުޅުންގެ ގޭގެއަށް އެންޓި ކޮރަޕްޝަން ކޮމިޝަން (އޭސީސީ) އިން ވަދެ ބަލާ ފާސްކުރަން ފަށައިފިއެވެ.

އޭސީސީން މެމްބަރުންގެ ގެތަކަށް ވަދެފައި ވަނީ ތަހުގީގު ކުރަމުންދާ މައްސަލައެއްގެ ހެކި ހޯދުމަށްޓަކައި ކޯޓު އަމުރެއްގެ ދަށުންނެވެ.

ކުރީ ސަރުކާރުގެ "ގެދޮރުވެރިޔާ" ސްކީމްގެ ދަށުން ފްލެޓްތައް ދޫކުރުމުގައި އިސްކޮށް މަސައްކަތްކުރި ކޮމިޓީގައި ހިމެނޭ ބޭފުޅުންގެ ތެރެއިން މިވަގުތު އޭސީސީން ބަލާ ފާސްކުރަމުންދަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި، ފްލެޓު ކޮމިޓީގެ މެމްބަރު ލިރުގާމް ވަހީދު މުހައްމަދުގެ އިތުރުން އަހުމަދު ވިސާން އަދި މުހައްމަދު އާރިފް ދިރުއުޅުއްވަމުންދާ ތަންތަނެވެ.

Advertisement

މިދިޔަ ސަރުކާރު ނިމެނިކޮށް ދޮރުވެރިޔާ ފްލެޓްތައް ލިބޭ މީހުންގެ ދާއިމީ ލިސްޓެއް އާއްމުކުރިއިރު، އޭސީސީން ވަނީ އެ ލިސްޓަށް ފްލެޓް ދޫކުރުން ހުއްޓުވާފައެވެ. އެއަށްފަހު މިދިޔަ އެޕްރީލް މަހުގެ 1 ވަނަ ދުވަހު އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ. އެހެންނަމަވެސް އޭގެ ތެރެއިން 59.6 އިންސައްތަ މީހުން ޝަރުތު ހަމަނުވާ ކަމަށް އޭރު އޭސީސީން ހާމަކުރިއެވެ.