މިއަހަރު ހައްޖުގެ މަތިވެރި އަޅުކަމަށް ދިޔަ ދިވެއްސަކަށް ހާޓް އެޓޭކެއް ޖެހުމާއި ގުޅިގެން ފަރުވާދެމުން އަންނަ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
ވަޒީރު ޝަހީމް މިފަދައިން ވިދާޅުވީ، މިއަދު ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.
މިގޮތުން ވަޒީރު ވިދާޅުވީ، ދިވެހި ހައްޖުވެރިއަކަށް ހާޓް އެޓޭކެއް ޖެހިގެން ހޮސްޕިޓަލުގައި ފަރުވާ ދެމުން އަންނަ ކަމަށް މައުލޫމާތު ލިބުނު ކަމަށާއި، މި ވަގުތާއި ހަމައަށް އެނގިފައިވާގޮތުގައި ބަލިމީހާގެ ހާލު ރަނގަޅުކަމަށެވެ.
"މިއަދު އަޅުގަނޑުމެންނަށް ހަބަރު ލިބުނު ހައްޖުވެރިއަކު ހާޓްއެޓޭކެއް ޖެހިގެން މިހާރު ހޮސްޕިޓަލުގައި ފަރުވާދެމުންދާ ކަމަށް. މިވަގުތާއި ހަމައަށް ލިބިފައި އޮތް ހަބަރުތަކަށް ބަލާއިރު، ބަލި މީހާގެ ހާލު އިރާދަކުރެއްވިއްޔާ ރަނގަޅު. އަޅުގަނޑު ވާނީ އެ ބަލިމީހާގެ އާއިލާއަށް ގުޅާފަ. ރާއްޖޭގައި އެބޭފުޅާގެ ދަރިފުޅުމެންނަށް ގުޅާފައި. ހާލު އެމީހުންނަށް ފޯރުކޮށްދީފައި."
ވަޒީރު ޝަހީމް ވިދާޅުވިއެވެ.
ޝަހީމް ވިދާޅުވީ، މޯލްޑިވްސް ހައްޖު ކޯޕަރޭޝަން އާއި ސަރުކާރުގެ ހައްޖު މިޝަންގެ ފަރާތުން ވެސް ވަރަށް ގާތުން ބަލިމީހާގެ ކަންތައްތައް ބަލަމުންދާ ކަމަށެވެ. އަދި ބަލި މީހުންނަށް ފަރުވާ ދިނުމަށްޓަކައިވެސް ވަކި ހާއްސަ ޑޮކްޓަރުންގެ ޓީމެއް މޯލްޑިވްސް ހައްޖު ކޯޕަރޭޝަންގެ އެބައޮތް ކަމަށާއި ހައްޖުވެރިންގެ ކަންތައްތައް ވަރަށް ގާތުން ބެލުމަށްޓަކައި ހައްޖު މިޝަންގައި ވެސް ވަކި ހާއްސަ ޑޮކްޓަރަކު ހިމަނާފައިވާނެކަމަށް ވަޒީރު ވިދާޅުވިއެވެ.
ބޮޑެތި ބަލިތަކުގެ މީހުންނަށް ހައްޖަށް ދިޔުމުގެ ހާއްސަ ކޯޓާ ތަކެއް ކުރީގައި އޮތް ސަރުކާރުން ވެސް ހަމަޖައްސާފައި އޮތްކަމަށާއި، އެ ކޯޓާތަކުގައި ވަރަށް ބޮޑެތި ބަލިތަކުގެ މީހުން ހައްޖަށްދާކަން ފާހަގަކުރައްވަމުން ވަޒީރު ޝަހީމް ވިދާޅުވީ، މިއީ ވަރަށް ރިސްކް ބޮޑު ކަމެއް ކަމަށެވެ.
ދިވެހި ރާއްޖެ އިން ހައްޖަށް ފުރާ 150 ހައްޖުވެރިން ހިމެނޭ އެންމެ ފަހު ގްރޫޕް މިއަދު ހައްޖަށް ފުރާފައިވާއިރު، މިއަހަރު މޯލްޑިވްސް ހައްޖު ކޯޕަރޭޝަންގެ އެހީގައި މުޅި ޖުމުލަ 1150 ދިވެހިން ހައްޖުގެ އަޅުކަން އަދާކުރުމަށް ސައުދީ އަރަބިއްޔާ އަށް ގޮސްފައިވާކަމަށް ވަޒީރު ޝަހީމް މައުލޫމާތު ދެއްވައެވެ.
Advertisement
This content is created and paid for by advertisers and does not involve Voice Journalists
