"ބިންވެރިޔާ ސްކީމް" ގެ ދަށުން ހިލޭ ބިން ދޫކުރުމުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ބޮޑެތި މާލީ ގެއްލުންތަކެއް ވެފައިވާކަން، އޮޑިޓް ރިޕޯޓުން ހާމަވެއްޖެއެވެ.

އޮޑިޓް ރިޕޯޓުން ހާމަވިގޮތުގައި، އެޗްޑީސީން ފޯރުކޮށްދީފައިވާ ލިޔެކިޔުންތަކަށް ބަލާއިރު، ބިންވެރިޔާ ސްކީމުގެ ދަށުން މި ބިންތައް ދޫކުރުމުން ލިބޭނެ ކަމަށް ލަފާކުރެވޭ ގެއްލުމަކީ 7.2 ބިލިއަން ރުފިޔާއާއި 10.5 ބިލިއަން ރުފިޔާ އާ ދެމެދުގެ އަދަދެކެވެ. 

މި ގެއްލުމުގެ ތެރެއިން 7.7 ބިލިއަން ރުފިޔާގެ ގެއްލުމަކީ ބިމުގެ އަގުން ލިބޭ ގެއްލުމެއްކަމަށާއި، އަދި، 3.3 ބިލިއަން ރުފިޔާގެ ގެއްލުމަކީ އެ ބިމުން ހޯދޭނެ އާމްދަނީ ނުހޯދޭނެތީ ލިބޭނެ ގެއްލުން ކަމަށް އޮޑިޓް ރިޕޯޓުގައި ވެއެވެ.

މި ގެއްލުންތަކަށް ބަދަލު ދިނުމުގެ ގޮތުން، ސަރުކާރުން ވަނީ، ގަލުފަޅާއި މާގިރިފަޅު އެޗްޑީސީއަށް ދީފައެވެ. އެ ދެ ފަޅުގެ، އަގަކީ 3.3 ބިލިއަން ރުފިޔާއެވެ. އެހެންކަމުން 7.7 ބިލިއަން ރުފިޔާ ހަމަޖައްސަން ހައުސިން މިނިސްޓްރީއާ އެކު މަސައްކަތްކުރުމަށް އަންގައިފައިވާ ކަމަށް އޮޑިޓް ރިޕޯޓުގައިވެއެވެ.

ބިން ވެރިޔާ ސްކީމުގެ ދަށުން ހިލޭ ބިން ދޫކުރަން ނިންމުމާ އެކު އެ ކަމާ ބައެއް ޢާންމުންނާއި ބައެއް ސިޔާސީ ބޭފުޅުން ވެސް ވަނީ ކަންބޮޑުވުން ފާޅުކުރިކަން ފާހަގަކޮށްލެވެއެވެ. ނަމަވެސް، ބޯހިޔާވަހި ކަމުގެ މައްސަލައަށް ޙައްލެއް ހޯދައިދިނުމުގެ މަޤުސަދުގައި، ސަރުކާރުން އެ މަޝްރޫޢު ކުރިއަށް ގެންގޮސް، އެ ސްކީމްގެ ފުރަތަމަ ފިޔަވަހީގެ ދަށުން ވަނީ، ޖުމުލަ 9،003 ގޯތި ދޫކުރަން ނިންމައިފައެވެ.