އިރުމަތީ އެފްރިކާގެ ގައުމެއް ކަމަށްވާ މަލާވީ ގެ ނައިބު ރައީސް ސައުލޯސް ޗިލިމާ ދަތުރުކުރައްވަމުން ގެންދެވި މިލިޓަރީ މަތިންދާބޯޓު ގެއްލިއްޖެއެވެ.

ޗިލިމާގެ އިތުރުން 9 މީހަކު ތިބި މި ބޯޓު އެގައުމުގެ ވެރިރަށް ލިލޮންގްވޭ އިން ފުރައިގެން އެގައުމުގެ އުތުރުގައި އޮންނަ އެމްޒޫޒޫ އިންޓަނޭޝަނަލް އެއާޕޯޓަށް މިސްރާބު ޖަހާފައިވަނިކޮށް، ރާޑަރުން ގެއްލުނީ ކަމަށް އެގައުމުގެ ޑިފެންސް ފޯސް އިން ހާމަކުރެއެވެ.

ޗިލިމާގެ މި ދަތުރުފުޅަކީ މީގެ ތިން ދުވަސް ކުރިން އަވަހާރަވި، އެގައުމުގެ ކުރީގެ ކެބިނެޓް މިނިސްޓަރު ރާލްފް ކަސަމްބާރާ ގެ ޖަނާޒާގައި ބައިވެރިވެވަޑައިގަތުމަށް ކުރައްވަމުން ގެންދެވި ދަތުރުފުޅެކެވެ.

Advertisement

މިކަމާއި ގުޅިގެން އެގައުމުގެ ރައީސް ލަޒަރުސް ޗަކްވެރާ ވިދާޅުވީ، ގެއްލުނު ބޯޓުގެ މަސައްކަތް ހުއްޓާނުލާ ކުރަމުން އަންނަ ކަމަށާއި، ބޯޓު ފެންނަންދެން އެ މަސައްކަތް ކުރިއަށް ގެންދިޔުމަށް އަމުރުކޮށްފައިވާނެ ކަމަށެވެ. އަދި މިކަމާއި ގުޅިގެން އެގައުމުގެ އާއްމުންނާއި އެއްފަދައިން ޗަކްވެރާ ވެސް ކަންބޮޑުވެވަޑައިގަންނަވާ ކަމަށާއި، މި ބޯޓު ހޯދުމަށް ލިބެން ހުރި ހުރިހާ ވަސީލަތްތަކެއް ބޭނުންކުރާނެ ކަމަށް ވެސް އެބޭފުޅާ ވިދާޅުވިއެވެ.

މި ބޯޓާއި އޭގައި ތިބި މީހުން ހޯދުމަށް އެގައުމުގެ ކަމާ ބެހޭ ފަރާތްތަކުން ހުއްޓާނުލާ ކުރަމުން އަންނަ މަސައްކަތްތަކަށް މިހާތަނަށް އެއްވެސް އަލިމަގެއް ފެނިފައެއް ނުވެއެވެ.