ގްރޭޑް 6 އިން މަތީގެ ދަރިވަރުންނަށް އިމާމުވެ ހުކުރާއި ކޭތަނަމާދު ކުރުމަށް ވަގުތީ ހުއްދަ ދޫކުރެވޭ ގޮތަށް އިސްލާމީ ކަންތައްތަކާއި ބެހޭ ވުޒާރާ އިން އުސޫލަށް ބަދަލުގެނެސްފިއެވެ.

އިސްލާމީ ކަންތައްތަކާއި ބެހޭ ވުޒާރާއިން އާއްމުކުރި އުސޫލުގައިވާ ގޮތުން ގްރޭޑު 6 އިން މަތީގެ ކުދިންނާއި އުމުރުން 65 އަހަރުން މަތީގެ މީހުންނަށް  ވަކި ހާއްސަ ހާލަތްތަކެއްގައި ހުކުރު ނަމާދާއި ކޭތަ ނަމާދުކުރުމަށް ހުއްދަ ދޫކުރެވޭނެއެވެ.

މިއީ ހަ މަސް ނުވަތަ އެއް މަސް ދުވަހުގެ މުއްދަތަކަށް ދެވޭ ހުއްދައަކަށް ވާއިރު، މި ހުއްދަ ދޫކުރެވޭނެ ހާލަތްތައް އެ ވުޒާރާއިން ބަނީ ބަޔާންކޮށްފައެވެ.

Advertisement

އޭގެ ތެރޭގައި ހިމެނެނީ، އިމާމުވެ ހުކުރު ނަމާދާއި ކޭތަ ނަމާދުކުރާނެ އެއްވެސް މީހަކު ނެތް ނަމަ ގާބިލް މީހަކަށް ހުއްދަ ހޯދުމަށް އެދި ކަމާގުޅޭ އިދާރާއަކުން ހުށަހެޅުމުން އެ މީހަކަށް ހަ މަސް ދުވަހަށް ވުރެ އިތުރު ނުވާނެ ހުއްދައެއް ދިނުމާއި އެ ނަމާދުތައް ކުރަން ހުއްދަ އޮތް މީހަކު ބަލިވެއްޖެ ނަމަ އެހެން މީހަކަށް އެއް މަސް ދުވަހުގެ މުއްދަތަށް ހުއްދައެއް ދިނުމެވެ.

ހަމައެއާއިއެކު، 65 އަހަރުން މަތީގެ މީހުންނަށް މި ހާލަތްތަކުގައި ވަގުތީ ހުއްދަ ދޫކުރާނީ އެ މީހަކަށް ސިއްހީ ގޮތުން ޒިންމާ އަދާކުރެވޭވަރުގެ ގާބިލްކަން ހުރި ނަމަ ކަމަށާއި، ހަމަ އެ އުސޫލުން ގްރޭޑު 6 އިން ފެށިގެން މަތީ ގްރޭޑްތަކުގެ ދަރިވަރުންގެ ތެރެއިން ރީތިކޮށް ގުރުއާން ކިޔަވައި އަދި ނަމާދުގެ ހުކުމްތައް އެނގޭ ކުދިންނަށް ތަމްރީނު ދިނުމުގެ ބޭނުމުގައި ވަގުތީ ހުއްދަ ދޫކުރެވޭނެ ކަމަށް އެ ވުޒާރާއިން މައުލޫމާތުދެއެވެ.

މީގެ އިތުރުން، ގްރޭޑު 10-12 އާ ހަމައަށް ކިޔަވާ ކުއްޖެއް ނަމަ ނުވަތަ ސްކޫލު ނިންމާފައިވާ ކުދިންގެ ތެރެއިން 18 އަހަރު ނުފުރޭ ކުއްޖަކަށް އަނގަބަހުން ދޭ އިމްތިހާނަކުން މަދުވެގެން 75 ޕަސެންޓް މާކްސް ލިބިއްޖެ ނަމަ، ނުވަތަ ހަތީބުކަމުގެ ތަމްރީން ފުރިހަމަކޮށް، އެ ތަމްރީނަށް ކަނޑައަޅާ 10 ޕަސެންޓް މާކްސް ލިބިފައިވާނަމަ މި ހުއްދަ ދޫކުރާނެއެވެ.

އިމާމުކަމުގެ ސާނަވީ އަދި މަތީ ސާނަވީއާ އެއް ފެންވަރުގެ ސަނަދެއް ހާސިލްކޮށްފައިވާ ނަމަ 10 ޕަސެންޓް ލިބޭއިރު، އިސްލާމީ މަރުކަޒާއި ކިންގް ސަލްމާން މިސްކިތުގައި އިމާމުގެ ހުކުރު ނަމާދާއި ކޭތަ ނަމާދުކުރުމުގެ ހުއްދަ ދޭނީ ދީނީ ދާއިރާއަކުން މަދުވެގެން ޑިގްރީ ސެޓްފިކެޓް ހާސިލް ކޮށްފައިވާ ނަމައެވެ.

މިކަމަށްޓަކައި މާލޭގައި އުޅޭ މީހުން މީހުން އިސްލާމީ ކަންތައްތަކާއި ބެހޭ ވުޒާރާއިން ޓެސްޓް ކުރުމަށް ހަމަޖެހިފައިވާއިރު،  ރަށްރަށުގައި ދިރިއުޅޭ ފަރާތްތައް  ރަށެއްގެ ކައުންސިލަށް ހާޒިރުވެގެން އޮންލައިންކޮށް ނުވަތަ ވުޒާރާއިން ކަނޑައަޅާ ގޮތަކަށް ޓެސްޓް ކުރެވޭނެ ކަމަށް އެ ވުޒާރާއިން މައުލޫމާތު ދެއެވެ.

މިނިސްޓްރީން އަދި ރަށްރަށުގައި ކައުންސިލްތަކުން މި ނަމާދުތައް ކުރާ ފަރާތްތަކުގެ ޕޫލެއް އެކުލަވާލުމަށް ވަނީ ހަމަޖެހިފައެވެ.