އިރުމަތީ އެފްރިކާގެ ގައުމެއް ކަމަށްވާ މަލާވީ ގެ ނައިބު ރައީސް ސައުލޯސް ޗިލިމާ ދަތުރުކުރައްވަމުން ގެންދެވި ބޯޓު ވެއްޓި، އަވަހާރަވެއްޖެއެވެ.

ޗިލިމާގެ އިތުރުން 9 މީހަކު ތިބި މި ބޯޓު އެގައުމުގެ ވެރިރަށް ލިލޮންގްވޭ އިން ފުރައިގެން އެގައުމުގެ އުތުރުގައި އޮންނަ އެމްޒޫޒޫ އިންޓަނޭޝަނަލް އެއާޕޯޓަށް މިސްރާބު ޖަހާފައިވަނިކޮށް، ރާޑަރުން ގެއްލުނީ ކަމަށް އެގައުމުގެ ޑިފެންސް ފޯސް އިން މީގެ ކުރިން ހާމަކޮށްފައިވާއިރު، އެގައުމުގެ ރައީސް ލަޒަރުސް ޗަކްވެރާ ވަނީ ޗިލިމާ އަވަހާރަވިކަން ކަށަވަރުކޮށްދެއްވާފައެވެ.

ޗަކްވެރާ ވިދާޅުވީ، ބޯޓު ވެއްޓިފައި އޮތް ތަން ހޯދައި، އެތަނަށް ދެވުނު އިރު، އެ ބޯޓުގައި ދަތުރުކުރި މީހުންގެ ތެރެއިން އެއްވެސް މީހަކު ސަލާމަތްވެފައި ނުވާ ކަމަށެވެ.

Advertisement

ޗިލިމާގެ މި ދަތުރުފުޅަކީ މީގެ ތިން ދުވަސް ކުރިން އަވަހާރަވި، އެގައުމުގެ ކުރީގެ ކެބިނެޓް މިނިސްޓަރު ރާލްފް ކަސަމްބާރާ ގެ ޖަނާޒާގައި ބައިވެރިވެވަޑައިގަތުމަށް ކުރައްވަމުން ގެންދެވި ދަތުރުފުޅެކެވެ.

އުމުރުފުޅުން 51 އަހަރުގެ ޗިލިމާ އަކީ 2014 އަހަރުން ފެށިގެން އެގައުމުގެ ނައިބު ރައީސް ކަމުގެ މަގާމުގައި ހުންނެވި ބޭފުޅާއެވެ.